డాక్టర్ కావాలనేది అతని ఆశయం. దానికి తగ్గట్లుగానే ఎంబీబీఎస్ సీటు సాధించాడు. కానీ, అనుకోకుండా హంతకుడిగా మారాడు. చేసిన తప్పునకు 14ఏళ్లు జైలు జీవితం అనుభవించాడు. అయినా.. జీవిత ఆశయాన్ని మాత్రం మార్చుకోలేదు. తన జీవితాన్ని ఎక్కడ పోగుట్టుకున్నాడో తిరిగి అక్కడి నుంచే ప్రారంభించి అందరికీ ఆదర్శంగా నిలుస్తున్నాడు కర్ణాటకకు చెందిన సుభాష్ పాటిల్.
ప్రేయసితో కలిసి హత్య..
కర్ణాటక కలబుర్గికి చెందిన సుభాష్ పాటిల్.. 1997లో ఎంబీబీఎస్లో చేరాడు. ఆ సమయంలో తన ఇంటికి సమీపంలో ఉండే ఓ మహిళతో ప్రేమలో పడ్డాడు. అప్పటికే పెళ్లయిన ఆమె భర్తకు ఈ విషయం తెలిసి బెదిరించినందున.. ప్రేయసితో కలిసి ఆమె భర్తను హత్యచేశాడు సుభాష్. ఈ కేసులో సుభాష్ పాటిల్, సదరు మహిళ దోషులుగా తేలినందున.. 2002లో కోర్టు వారికి జీవిత ఖైదు ఖరారు చేసింది. అప్పటికి ఎంబీబీఎస్ మూడో సంవత్సరం చదువుతున్న సుభాష్ చదువు అక్కడితో ఆగిపోయింది.
అయితే, 14 ఏళ్ల జైలు జీవితం గడిపిన సుభాష్ సత్ప్రవర్తన కారణంగా 2016లో విడుదలయ్యాడు. బయటకు వచ్చిన సుభాష్.. డాక్టర్ కావాలన్న తన ఆశయాన్ని మాత్రం మరవలేదు. ఎలాగైనా ఎంబీబీఎస్ పూర్తిచేయాలని నిశ్చయించుకుని మధ్యలో వదిలేసిన చదువు కొనసాగిస్తానని సదరు యూనివర్సిటీకి విన్నవించుకున్నాడు. అతని అభ్యర్థనను మన్నించిన విశ్వవిద్యాలయం న్యాయసలహా అనంతరం చదువు కొనసాగించేందుకు అంగీకరించింది. ఫలితంగా 2016లో ఎంబీబీఎస్లో తిరిగి చేరిన సుభాష్.. 2019లో ఎంబీబీఎస్ పట్టా పొందాడు. తాజాగా ఇంటర్న్‌షిప్‌ కూడా పూర్తి చేసుకున్నాడు. పూర్తిస్థాయి వైద్యుడిగా సేవలు అందించేందుకు సిద్దమయ్యాడు.
"డాక్టర్ కావాలనేది నా చిన్నప్పటి కల. 1997లో ఎంబీబీఎస్లో చేరా. ఐతే రెండేళ్ల తర్వాత దురదృష్టవశాత్తూ జైలుకు వెళ్లా. నా జీవితంపై ఆశలు వదిలేసుకున్నా. జైలులోనే చదవడం ప్రారంభించా. అలా జైళ్లో ఉన్నప్పుడే కర్ణాటక రాష్ట్ర ఓపెన్ యూనివర్సిటీ ద్వారా జర్నలిజంలో డిప్లొమా, ఎంఏ జర్నలిజం పూర్తిచేశా. సత్ప్రవర్తన కారణంగా స్వాతంత్ర దినోత్సవాన్ని పురస్కరించుకుని 2016లో ప్రభుత్వం నన్ను విడుదల చేసింది. బయటకు వచ్చాకా సమాజం నన్ను ఎలా చూస్తుందోనని అనుమానం వేసింది. ఎంబీబీఎస్ లో తిరిగి చేరాలని మా నాన్న సూచించారు. దీంతో తిరిగి చదువుకునే అవకాశం కల్పించాలని అభ్యర్థిస్తే... 2016 సెప్టెంబర్ లో రాజీవ్ గాంధీ యూనివర్సిటీ ఎంబీబీఎస్ పూర్తిచేసేందుకు సమ్మతించింది."
-సుభాష్ పాటిల్