ఆ చిన్నారి జ్ఞాపక శక్తికి అవార్డులు దాసోహం.. ఏడేళ్లకే డాక్టరేట్​

డాక్టర్​ కావాలంటే మాటలు కాదు.. వైద్య విద్య చదివినా.. పీహెచ్​డీ చేసినా.. డాక్టరేట్​ పట్టా పొందాలంటే కనీసం 25 ఏళ్లు పడుతుంది. కానీ, కర్ణాటకకు చెందిన ఓ చిన్నారి ఏడేళ్లు పూర్తికాకుండానే డాక్టర్​ అయిపోయింది.. అదెలా అంటారా? అయితే ఈ కథనం చదివేయండి..

కర్ణాటకకు చెందిన ఏడేళ్ల వయసున్న వైధృతి నాగరాజ్ కోరిషెట్టర్​ అనే బాలిక.. బాల మేధావిగా అందరి మన్ననలు పొందుతోంది. ఆ చిన్నారి అద్భుత జ్ఞాపక శక్తికి మెచ్చిన మధురై విశ్వవిద్యాలయం డాక్టరేట్​తో సత్కరించింది.

బల్లారి జిల్లా బొమ్మనహల్లికి చెందిన నాగరాజ్​, భారతిల కుమార్తె వైధృతి. గడగ్​ జిల్లా నారగుండలో రెండో తరగతి చదువుతోంది. రెండేళ్ల వయసులోనే వైధృతికి జనరల్​ నాలెడ్జ్ ఒంటబట్టేసింది. ఎంతలా అంటే​... జాతీయ, అంతర్జాతీయ రాజకీయాలు, ఆర్థికాంశాలు, చరిత్ర పుటలు, కవుల పేర్లు, నదులు, రాజులు, సామ్రాజ్యాలు.. అబ్బో ఒక్కటేమిటీ ఏది అడిగినా ఇట్టే సమాధానం చెప్పేసేంతగా రాటుదేలిపోయింది.

అద్భుత జ్ఞాపకశక్తిని ప్రదర్శించి పిన్న వయసులోనే వందలాది అవార్డులు కైవసం చేసుకుంది వైధృతి. ఇప్పుడు మధురై విశ్వ విద్యాలయం డాక్టరేట్​తో మరో గౌరవాన్ని దక్కించుకుంది.

ఇదీ చదవండి:కేరళ: అంగరంగ వైభవంగా ట్రాన్స్ ఉమన్​ వివాహం