భారత్​ అమ్ములపొదిలో 'ధనుష్ శతఘ్నులు'

భారత సైన్యం మరింత పటిష్టమైంది. పూర్తిగా స్వదేశీ పరిజ్ఞానంతో రూపొందించిన అత్యాధునిక ధనుష్ శతఘ్నులు అందుబాటులోకి వచ్చాయి. మధ్యప్రదేశ్ జమల్​పురలో జరిగిన ఓ ప్రత్యేక కార్యక్రమంలో ఆర్డ్​నెన్స్​ ఫ్యాక్టరీ బోర్డు (ఓఎఫ్​బీ) భారత సైన్యానికి 6 శతఘ్నులను అప్పగించింది.

సరిహద్దు భద్రతలో భారత సైన్యం మరింత బలోపేతమైంది. అత్యాధునిక సాంకేతికతను ఉపయోగించి పూర్తిగా స్వదేశీ పరిజ్జానంతో తయారు చేసిన ధనుష్ శతఘ్నులు సైన్యానికి అందుబాటులోకి వచ్చాయి. మొత్తం 114 ధనుష్​ శతఘ్నులను తయారు చేయాల్సి ఉంది ఆర్డ్​నెన్స్​ ఫ్యాక్టరీ బోర్డు (ఓఎఫ్​బీ). ప్రస్తుతానికి ఆరు శతఘ్నులను మధ్యప్రదేశ్ జమల్​పురలో జరిగిన ఓ ప్రత్యేక కార్యక్రమంలో సైన్యానికి అప్పగించింది ఓఎఫ్​బీ. మేకిన్‌ ఇండియా కార్యక్రమం ద్వారా భారత సైన్యానికి అందుతున్న తొలి శతఘ్ని ధనుష్​. దీని బరువు 13టన్నుల లోపే ఉంటుంది.

ఆర్డ్​నెన్స్ ఫ్యాక్టరీ బోర్డు, డీఆర్‌డీవో, డీజీక్యూఏ, డీపీఎస్‌యూ, భారత్‌ ఎలక్ట్రానిక్‌ లిమిటెడ్‌, సెయిల్‌తో పాటు పలు ప్రైవేటు సంస్థలు సంయుక్తంగా ధనుష్ శతఘ్నులను తయారు చేస్తున్నాయి.

ధనుష్​ ప్రత్యేకతలు

⦁ ఆటోమేటెడ్ టెక్నాలజీతో ఒకేసారి మూడు నుంచి ఆరు శతఘ్నులతో ఒకే లక్ష్యం వైపు కాల్పులు జరపవచ్చు.

⦁ గంటకు 42 రౌండ్ల వరకు కాల్పులు జరపగలదు.

⦁ 38 కిలోమీటర్ల దూరం వరకు దాడి చేసే సామర్థ్యం

⦁ పగలు, రాత్రితో సంబంధం లేకుండా ఎలాంటి వెలుతురులోనైనా దాడులు చేయగలదు.

⦁ స్వయంచోదక(సెల్ఫ్‌ ప్రొపెల్షన్‌) వ్యవస్థ, ఆటోలేయింగ్‌ సౌకర్యం

ఇదీ చూడండి: '1 కాదు... 5 వీవీప్యాట్​ రసీదులు లెక్కించండి'