ఆ 503 మంది ఎంపీల ఆస్తుల వివరాలు రహస్యం!

సార్వత్రిక ఎన్నికల్లో గెలిచిన ఎంపీలు ప్రమాణం చేసిన 90 రోజుల్లో తమ ఆస్తుల వివరాలు తెలియజేయాల్సి ఉన్నప్పటికీ.. గత ఏడాది డిసెంబర్​ 10 నాటికి 503 మంది లెక్కలు చెప్పలేదు. సమాచార హక్కు చట్టం ద్వారా ఈ విషయం వెలుగులోకి వచ్చింది. వివరాలు తెలిపిన వారిలో అధికారం భాజపా నుంచి అత్యధికంగా 25 మంది ఉన్నారు.

ఎన్నికల్లో పారదర్శకత కోసం పార్లమెంట్​లో పలు నియమాలను తీసుకొచ్చారు. ఇందులో భాగంగా సార్వత్రిక ఎన్నికల్లో గెలుపొందిన ఎంపీలు.. తమ ఆస్తుల వివరాలు లోక్​సభ సచివాలయానికి తెలియజేయాల్సి ఉంటుంది. అయితే.. 2019 మే లో జరిగిన 17వ లోక్​సభ ఎన్నికల్లో గెలుపొందిన సభ్యుల్లో 503 మంది.. తమ ఆస్తుల వివరాలను సమయంలోపు అందించలేదు. కేవలం 36 మంది ఎంపీలు తమ, తమపై ఆధారపడే వారి స్థిర, చరాస్తుల వివరాలను తెలియజేశారు.

స.హ చట్టం ద్వారా వెలుగులోకి

లోక్​సభ సభ్యుల ఆస్తుల వివరాలపై ఉత్తరాఖండ్​లోని కాశీపుర్​కు చెందిన నదీమొద్దిన్​ అనే వ్యక్తి సమాచార హక్కు చట్టం ద్వారా దరఖాస్తు చేసుకోగా.. ఈ విషయం వెలుగులోకి వచ్చింది. ఆయన దరఖాస్తుకు సమాధానంగా లోక్​సభ సచివాలయం.. 2019 డిసెంబర్​ 10 నాటికి ఎంపీల ఆస్తుల వివరాలను అందించింది.
వివరాలు అందించిన వారిలో ప్రధానమంత్రి నరేంద్ర మోదీ సహా భాజపాలో 25 మంది, తృణమూల్​ కాంగ్రెస్​-8, బీజేడీ-1, శివసేన-1, ఏఐడీఎంకే నుంచి ఒకరు ఉన్నారు.

కేంద్ర​ మంత్రులు, రాజకీయ పార్టీల సీనియర్​ నేతలు ఇంకా తమ ఆస్తుల వివరాలు తెలియజేయలేదు.

2004 నిబంధనల ప్రకారం..

లోక్​సభ సభ్యుల ఆస్తులు( ప్రాపర్టీ అండ్ డ్యూటీస్ డిక్లరేషన్)-2004 నిబంధనల ప్రకారం.. ఎంపికైన ప్రతి సభ్యుడు ప్రమాణస్వీకారం చేసిన 90 రోజుల్లో తమ స్థిర, చరాస్తుల వివరాలు తెలియజేయాల్సి ఉంటుంది.

ఏడుగురు ఎంపీలకు మినహాయింపు..

17వ లోక్​సభకు ఎంపికైన సభ్యుల్లో ఏడుగురికి మినహాయింపు ఉంటుంది. కొందరు వివిధ కారణాల వల్ల ప్రమాణ స్వీకారం ఆలస్యంగా చేశారు. ఇందులో ఎల్​జేపీ ఎంపీ ప్రిన్స్​రాజ్​, ఎన్సీపీ ఎంపీ శ్రీనివాస్​ దాదాసాహిబ్​ పాటిల్​, భాజపా ఎంపీ హిమాద్రి సింగ్​, డీఎంకే ఎంపీ డీఎం కతిర్​ 2019 నవంబర్​ 18న ప్రమాణం చేశారు. రామచంద్ర పాసవాన్​.. జులై 21న మరణించారు. అతుల్​ రాయ్​ డిసెంబర్​ 10 వరకు ప్రమాణం చేయలేదు. ఉద్యాన్​ రాజే ప్రతాప్​ సింగ్​ డిసెంబర్​ 14న రాజీనామా చేశారు.

ఇదీ చూడండి: ప్రపంచ అతిపెద్ద లిఖిత రాజ్యాంగంలో ప్రత్యేకతలెన్నో..