దేశ రాజధాని దిల్లీలో కరోనా వైరస్ ఉద్ధృతంగా మారుతోంది. ఈ నేపథ్యంలో వారం రోజుల్లో 20 వేల పడకలను సిద్ధం చేయాలని జిల్లా అధికారులను, ఇతర ఉన్నతాధికారులను ఆదేశించింది కేజ్రీవాల్ సర్కార్.
ప్రభుత్వ ఆదేశాలకు అనుగుణంగా మొత్తం 40 హోటళ్లను, 80 ఫంక్షన్ హాళ్లను వైద్య కేంద్రాలుగా మారుస్తున్నట్లు అధికారులు తెలిపారు. వాయువ్య జిల్లా పాలనాధికారులు మొత్తం 22 ఫంక్షన్ హాళ్లలో 3,300 పడకలను ఏర్పాటు చేసినట్లు వెల్లడించారు. ఫంక్షన్హాళ్లు.. నర్సింగ్ హోంలుగా, హోటళ్లు.. ఆసుపత్రులుగా సేవలు అందించనున్నట్లు వెల్లడించారు.
కేజ్రీ సర్కార్ రూపొందించిన 'దిల్లీ కరోనా యాప్' వివరాల ప్రకారం నగరంలో 9,850 పడకలు ఉండగా.. వీటిలో 5,448 పడకల్లో కరోనా బాధితులు చికిత్స పొందుతుండగా.. మరో 4,402 పడకలు ఖాళీగా ఉన్నట్లు పేర్కొంది. హోటళ్లలో 4 వేల పడకలు, ఫంక్షన్ హాల్స్లో 11 వేల పడకలు, నర్సింగ్ హోంల్లో 5 వేల పడకలు ఉన్నట్లు అధికారులు స్పష్టం చేశారు.