అజాగ్రత్త వల్లే.. ఆ కుటుంబంలో 25 మందికి కరోనా

కరోనా కాలంలో అత్యవసరమైతే గానీ బయటకి వెళ్లొద్దంటున్నారు ఆరోగ్య నిపుణులు. కానీ అవేమీ పట్టించుకోకుండా ఓ చిన్నారికి తలనీలాలు తీయించేందుకు వెళ్ళి మహమ్మారిని వెంటబెట్టుకొచ్చారా కుటుంబసభ్యులు. బిహార్​కు చెందిన ఆ కుటుంబంలోని 25 మంది ఒకేసారి కొవిడ్​ బారిన పడ్డారు. దీంతో గ్రామస్థులు భయంతో వణికిపోతున్నారు.

బిహార్ బోధ్ ​గయాలోని ఓ గ్రామంలో ఒకే కుటుంబానికి చెందిన 25 మందికి కరోనా సోకినట్లు నిర్ధరించారు వైద్యులు. దీంతో ఇంటిల్లిపాదిని ఐసోలేషన్​ వార్డుకు తరలించారు.

వద్దన్నా వినకుండా...

కరోనా కాలంలో సమూహాలుగా తిరగొద్దని, జాగ్రత్తలు పాటించాలని ప్రభుత్వాలు గొంతుచించుకుంటున్నా.. బోధ్​ గయాకు చెందిన ఆ కుటుంబంలోని ఓ నవజాత శిశువు తలనీలాలు సమర్పించేందుకు ఝార్ఖండ్​కు వెళ్లారు. ఆ కార్యక్రమంలో మరెందరో బంధువులు పాల్గొన్నారు. తిరిగి ఇళ్లకు చేరుకున్నాక, కొందరికి ఆరోగ్యం క్షీణించింది. దీంతో కుటుంబ సభ్యులందరు కరోనా పరీక్షలు చేయించుకున్నారు. దాదాపు 30 మంది నమూనాల్లో 25 మందికి కొవిడ్​-19 పాజిటివ్​ అని తేలింది.

ఒకేసారి ఒకే కుటుంబానికి చెందిన 25 మందికి కరోనా ఉందని తెలిసేసరికి.. గ్రామస్థులు భయాందోళనలకు గురవుతున్నారు. దీంతో అధికారులు వైరస్​ వ్యాప్తిని అరికట్టేందుకు అన్ని చర్యలు చేపట్టారు. బోధ్ ​గయాలో కొవిడ్​ కేసులు రోజురోజుకూ పెరుగుతున్నాయని, ఇప్పటికే జిల్లాలో 300 మందికి వైరస్​ సోకిందని అన్నారు అధికారులు.

కేంద్ర ఆరోగ్య, కుటుంబ సంక్షేమ మంత్రిత్వ శాఖ ప్రకారం బిహార్​ వ్యాప్తంగా ఇప్పటివరకు 14,575 కరోనా కేసులు నమోదయ్యాయి. వారిలో 10,109 మంది కోలుకోగా.. 119 మంది మహమ్మారి ధాటికి మృతి చెందారు.

ఇదీ చదవండి: ఇక ఒకే పీపీఈ కిట్​ను మళ్లీమళ్లీ వాడొచ్చు!