జేఈఈ మెయిన్స్​లో 24 మందికి 100కు వంద​

విద్యార్థులు ఎప్పుడెప్పుడా అని ఎదురుచూసిన జేఈఈ మెయిన్స్​ ప్రవేశ పరీక్ష ఫలితాలు సోమవారం వెలువడ్డాయి. ఈ ఫలితాల్లో దేశవ్యాప్తంగా 24 మంది విద్యార్థులు 100 శాతం మార్కులతో ఉత్తీర్ణులయ్యారు. వీరిలో తెలుగు రాష్ట్రాల నుంచి మొత్తం ఆరుగురు ఉన్నారు.

ఐఐటీ, ఎన్​ఐటీ, ట్రిపుల్​ఐటీలతో పాటు దేశ వ్యాప్తంగా ప్రముఖ విద్యాసంస్థల్లోని ఇంజినీరింగ్ కోర్సుల్లో చేరేందుకు నిర్వహించే జేఈఈ-మెయిన్స్​ ప్రవేశ పరీక్ష ఫలితాలు సోమవారం వెలువడ్డాయి. ఇంటర్​ విద్యను పూర్తిచేసి ఎప్పుడెప్పుడు పై చదువులు అభ్యసిద్దామా అని ఎదురు చూస్తున్న విద్యార్థుల్లో ఈ ఫలితాలు నూతనోత్తేజాన్ని నింపాయి.

కేంద్ర మానవవనరుల మంత్రిత్వశాఖలోని నేషనల్​ టెస్టింగ్​ ఏజెన్సీ (ఎన్​టీఏ) సోమవారం విడుదల చేసిన ఈ ఫలితాల్లో అనూహ్యంగా మొత్తం 24 మంది విద్యార్థులు 100 శాతం మార్కులతో ఉత్తీర్ణులయ్యారు. ఈ విద్యార్థుల జాబితాలో రాజస్థాన్​, తెలంగాణ రాష్ట్రాల నుంచి తలో నలుగురు, ఉత్తర్​ప్రదేశ్​, మధ్యప్రదేశ్​, మహారాష్ట్ర నుంచి తలో ముగ్గురు. ఆంధ్రప్రదేశ్​ నుంచి ఇద్దరు, దిల్లీ, కర్ణాటక, హరియాణా, పంజాబ్​ రాష్ట్రాల నుంచి మిగతా విద్యార్థులు చోటు సంపాదించారు.

రెండుసార్లు పరీక్ష

ఇదివరకు ఎన్నడూ లేని విధంగా ఈ ఏడాది జనవరి, ఏప్రిల్​ నెలల్లో రెండుసార్లు జేఈఈ-మెయిన్స్​ పరీక్షను ఆన్​లైన్​లో నిర్వహించారు అధికారులు.

"విద్యార్థులు జనవరి, ఏప్రిల్​లో రెండుసార్లు ప్రవేశపరీక్ష రాసి ఉంటే... అందులో ఉత్తమ స్కోరును పరిగణనలోకి తీసుకుంటారు. ఆ మార్కులనే విద్యాసంస్థల్లో సీట్లు ఇచ్చేందుకు పరిగణిస్తారు. మొత్తం 6.8 లక్షల మంది విద్యార్థులు రెండోసారి పరీక్ష రాయగా వారిలో 2.7 లక్షల మంది మొదటిసారితో పోలిస్తే తమ నైపుణ్యాన్ని మెరుగు పరుచుకున్నారు. విద్యార్థులకు ర్యాంకుల కేటాయింపులోనూ ఎన్​టీఏ మార్కులనే ప్రామాణికంగా తీసుకున్నారు. "
-కేంద్ర మానవవనరుల మంత్రిత్వశాఖ ఉన్నతాధికారి