వీవీప్యాట్​ స్లిప్పుల లెక్కింపుపై రివ్యూ పిటిషన్​

వీవీప్యాట్​ స్లిప్పుల లెక్కింపుపై 21 విపక్ష పార్టీలు సుప్రీంకోర్టులో రివ్యూ పిటిషన్​ దాఖలు చేశాయి. 50 శాతం వీవీ ప్యాట్​ స్లిప్పులు లెక్కించేలా ఈసీకి ఆదేశాలు ఇవ్వాలని అభ్యర్థించాయి.

వీవీప్యాట్​ స్లిప్పుల లెక్కింపుపై మరోసారి సుప్రీంకోర్టును ఆశ్రయించాయి 21 విపక్ష పార్టీలు. 50శాతం వీవీప్యాట్​ స్లిప్పులను తప్పనిసరిగా లెక్కించేలా ఎన్నికల సంఘానికి ఆదేశాలు జారీ చేయాలని కోరుతూ రివ్యూ పిటిషన్ దాఖలు చేశాయి.

గత తీర్పు...

ఎలక్ట్రానిక్​ ఓటింగ్ యంత్రాల పనితీరుపై అనుమానాలు వ్యక్తంచేస్తూ ఆంధ్రప్రదేశ్​ ముఖ్యమంత్రి చంద్రబాబు నాయుడు నేతృత్వంలో 21 విపక్ష పార్టీలు సుప్రీంకోర్టును ఆశ్రయించాయి. సార్వత్రిక ఎన్నికల్లో కనీసం 50 శాతం ఈవీఎంల్లో పోలైన ఓట్లను వీవీప్యాట్​ స్లిప్పులతో సరిపోల్చాలని కోరాయి.

విపక్షాల అభ్యర్థనపై ఈసీ అభ్యంతరం తెలిపింది. 50 శాతం వీవీప్యాట్ స్లిప్పులను లెక్కించడం సాధ్యపడదని తేల్చిచెప్పింది. అందుకు మౌలిక వసతులు, మానవ వనరులు సమస్య ఎదురవుతుందని పేర్కొంది.

ఈ వాదనలు విన్న సుప్రీంకోర్టు... ప్రతి శాసనసభ నియోజకవర్గం పరిధిలో ఒకటికి బదులు 5 వీవీప్యాట్​ ఈవీఎంల రసీదులు లెక్కించాలని తీర్పునిచ్చింది.

ఈ తీర్పుతో సంతృప్తి చెందని విపక్షాలు... సుప్రీంకోర్టులో రివ్యూ పిటిషన్​ దాఖలు చేశాయి.

ఇదీ చూడండి: సీజేఐ కేసులో 'కుట్ర'పై కీలక విచారణ