16ఏళ్లలో 2019లోనే పాక్​ అత్యధిక కాల్పులు

16 ఏళ్లలో 2019లోనే అత్యధికంగా కాల్పుల విరమణ ఒప్పందాన్ని పాక్​ ఉల్లంఘించిందని కేంద్ర హోంశాఖ అధికారులు వెల్లడించారు. గతేడాది పాక్​.. దాదాపు 3,200 సార్లు సరిహద్దు వెంబడి కాల్పులకు తెగబడిందని సమాచారం. కాల్పుల భయంతో సరిహద్దు ప్రాంత ప్రజలు ఇతర ప్రాంతాలకు వలస వెళుతున్నారని తెలుస్తోంది.

గత 16ఏళ్లల్లో ఎన్నడూ లేని విధంగా.. జమ్ముకశ్మీర్​ సరిహద్దు వెంబడి 2019లో పాకిస్థాన్​ సైన్యం దాదాపు 3,200 సార్లు కాల్పుల విరమణ ఒప్పందాన్ని ఉల్లంఘించిందని అధికారులు పేర్కొన్నారు. సగటున రోజుకు 9సార్లు కాల్పులకు పాక్​ సైన్యం తెగబడిందని ఓ సహ దరఖాస్తుకు సమాధానంగా వెల్లడించారు.

2019లో ఇండో-పాక్​ సరిహద్దు వెంబడి మొత్తం 3,289సార్లు పాకిస్థాన్​ దళాలు కాల్పులు జరిపాయని.. వీటిలో 1,565 ఘటనలు.. జమ్ముకశ్మీర్​కు స్వయం ప్రతిపత్తిని కల్పించే ఆర్టికల్​ 370 రద్దు చేసిన(ఆగస్టు) అనంతరం చోటుచేసుకున్నాయని సమాచారం.

"2019 అక్టోబర్​లో అత్యధికంగా 398సార్లు కాల్పులు జరిగాయి. నవంబర్​లో ఈ సంఖ్య 333, ఆగస్టులో 323, జులైలో 314, సెప్టెంబర్​లో 308, మార్చిలో 275సార్లు పాక్​ సైన్యం దుర్నీతిని ప్రదర్శించింది. నియంత్రణ రేఖ, అంతర్జాతీయ సరిహద్దు వెంబడి ఉన్న సైనిక శిబిరాలు, గ్రామాలే లక్ష్యంగా ఈ కాల్పులు జరిగాయి. భయంతో ప్రజలు సురక్షిత ప్రాంతాలు వలస వెళుతున్నారు."
--- హోంశాఖ సీనియర్​ అధికారి.

సామాజిక కార్యకర్త రోహిత్​ చౌదరి సహ చట్టం ద్వారా అడిగిన ప్రశ్నకు బదులుగా హోంమంత్రిత్వ శాఖ ఈ మేరకు సమాచారాన్ని అందించింది.
2018లో 2,వేల 923(సగటున రోజుకు 8), 2017లో 971సార్లు కాల్పుల విరమణ ఒప్పందాన్ని ఉల్లంఘించింది పాక్​.

కేంద్రం చర్యలు...

పెరుగుతున్న కాల్పుల ఘటనల దృష్ట్యా సరిహద్దు ప్రాంతాల్లో నివసించే ప్రజల కోసం కేంద్రం చర్యలు చేపట్టింది. రూ. 415 కోట్లతో 14,400 బంకర్లు నిర్మిస్తోంది. జమ్ము ప్రాంతంలో ఇప్పటికే 8వేల 600 బంకర్లు అందుబాటులో ఉన్నాయి.