యూపీలో మరో రేప్​- విషం తాగిన బాధితురాలు

ఉత్తర్​ప్రదేశ్​లో మరో అత్యాచార ఘటన ఆలస్యంగా వెలుగులోకి వచ్చింది. బాగ్​పత్​ ప్రాంతానికి చెందిన ఓ 17 ఏళ్ల బాలికపై పొరుగింటి వ్యక్తి అత్యాచారానికి పాల్పడ్డాడు. తర్వాత బాలిక విషం తాగి ఆత్మహత్యాయత్నానికి పాల్పడింది. నిందితుడిని అరెస్ట్​ చేసి దర్యాప్తు చేపట్టారు పోలీసులు.

దేశవ్యాప్తంగా సంచలనం సృష్టించిన ఉత్తర్​ప్రదేశ్​ హాథ్రస్​ ఘటన తర్వాత ఆ రాష్ట్రంలో జరిగిన బాలికల అత్యాచారాలు, అపహరణలకు సంబంధించిన ఘటనలు ఒక్కొక్కటిగా బయటకు వస్తున్నాయి. తాజాగా యూపీలోని బాగ్​పత్​ ప్రాంతానికి చెందిన ఓ 17 ఏళ్ల బాలికపై పొరుగింటి వ్యక్తి అత్యాచారానికి పాల్పడ్డ ఘటన ఆలస్యంగా వెలుగులోకి వచ్చింది. తర్వాత బాలిక విషం తాగి ఆత్మహత్యాయత్నానికి పాల్పడింది.

సెప్టెంబర్​ 27 విషం తాగింది అత్యాచార బాధితురాలు. అపస్మారక స్థితిలోకి వెళ్లింది. చికిత్స తర్వాత స్పృహలోకి వచ్చిన ఆమె.. తనపై జరిగిన ఘోరాన్ని తండ్రికి వివరించింది. అత్యాచారానికి పాల్పడింది పొరుగింటి వ్యక్తి నసీమ్​ అని తెలిపింది. అనంతరం బాధితురాలి తండ్రి సెప్టెంబర్​ 29న రాత్రి పోలీసులకు ఫిర్యాదు చేశాడు. కేసు నమోదు చేసుకుని నిందితుడు నసీమ్​ను అరెస్ట్​ చేశారు.

తన కూతురిపై అత్యాచారం మాత్రమే జరగలేదని, బ్లాక్​ మెయిల్​ చేస్తూ వేధింపులకు పాల్పడినట్లు బాధితురాలి తండ్రి ఫిర్యాదులో పేర్కొన్నారు. ఆ కారణంగానే ఆత్మహత్యాయత్నం చేసినట్లు చెప్పారు.

ఈ ఘటనలో నిందితుడిని అరెస్ట్​ చేసి దర్యాప్తు చేపట్టినట్లు జిల్లా ఎస్పీ అభిషేక్​ సింగ్​ తెలిపారు.

ఇదీ చూడండి: హాథ్రస్​ ఘటనలో ట్విస్ట్- బాధితురాలిపై అత్యాచారం జరగలేదు!