నేడు కశ్మీర్ పర్యటనకు విదేశీ ప్రతినిధుల బృందం

జమ్ముకశ్మీర్​లో నేడు 16 మంది విదేశీ ప్రతినిధుల బృందం పర్యటించనుంది. ప్రస్తుతం అక్కడి పరిస్థితుల గురించి వారికి వివరించనున్నారు అధికారులు. లాటిన్ అమెరికా, ఆఫ్రికా దేశాల ప్రతినిధులు ఈ బృందంలో ఉన్నారు.

ఆర్టికల్​ 370, అధికరణ 35ఏ రద్దు తర్వాత జమ్ముకశ్మీర్​లో తాజా పరిస్థితులను వివరించేందుకు 16 దేశాల ప్రతినిధులను నేడు పర్యటనకు తీసుకెళ్లనున్నారు అధికారులు. వీరిలో లాటిన్ అమెరికా, ఆఫ్రికా దేశాల ప్రతినిధులు ఉన్నట్లు తెలిపారు.

కశ్మీర్​లో పర్యటించి.. స్థానికుల ప్రస్తుత పరిస్థితులను అడిగి తెలుసుకోనున్నారు విదేశీ ప్రతినిధులు. భద్రతకు సంబంధించిన విషయాలను అధికారులు వారికి వివరించనున్నారు.

ఈ పర్యటనలో పొరుగు దేశం పాకిస్థాన్​.. కశ్మీర్​లో తీవ్రవాదాన్ని ప్రోత్సహిస్తున్న అంశాన్ని భద్రతా దళాలు వివరించనున్నాయని అధికారులు పేర్కొన్నారు. జమ్ము లెఫ్టినెంట్ గవర్నర్​ గిరీశ్​ చంద్ర ముర్ముతో విదేశీ ప్రతినిధుల బృందం భేటీ కానున్నట్లు వెల్లడించారు.

తాజా పరిస్థితులను తెలుసుకునేందుకు జమ్ముకశ్మీర్​ను సందర్శించాలని చాలా దేశాలు కోరినట్లు అధికారిక వర్గాలు తెలిపాయి.

ఐరోపా సమాఖ్య దేశాలు మాత్రం కశ్మీర్​ను మరికొద్ది రోజుల తర్వాత సందర్శించాలని భావిస్తున్నట్లు తెలుస్తోంది. కశ్మీర్ మాజీ ముఖ్యమంత్రులు ఫరూక్ అబ్దుల్లా, ఒమర్ అబ్దుల్లా, మెహబుబా ముఫ్తిలతో వారు సమావేశం కావాలని కోరుతున్నట్లు అధికారిక వర్గాలు పేర్కొన్నాయి.

ఆర్టికల్​ 370 రద్దు తర్వాత జమ్ముకశ్మీర్​ను విదేశీ ప్రతినిధులు బృందం సందర్శించడం ఇది రెండోసారి. గతంలో 23 మంది ఐరోపా సమాఖ్య ఎంపీలు ఇక్కడ పర్యటించారు.