మధ్యప్రదేశ్లో లోక్సభ ఎన్నికల చిత్రం మధ్యప్రదేశ్.... ఒకప్పుడు భాజపాకు కంచుకోట. వరుసగా 15ఏళ్లు ఆ పార్టీదే అధికారం. గతేడాది చివర్లో జరిగిన శాసనసభ ఎన్నికలతో పరిస్థితి మారింది. కాంగ్రెస్ అధికారంలోకి వచ్చింది. మధ్యప్రదేశ్ అసెంబ్లీతో పోలిస్తే లోక్సభ విషయంలో మరింత పేలవ రికార్డు కాంగ్రెస్ సొంతం. 14 స్థానాల్లో పదిహేనేళ్లుగా హస్తానికి గెలుపు అనేదే తెలియదు. సార్వత్రిక సమరంలో ఈ అడ్డంకిని దాటుకుని మధ్యప్రదేశ్లో ఏకచ్ఛత్రాధిపత్యం సాధించగలదా?
రాష్ట్రంలో మొత్తం 29 లోక్సభ స్థానాలు. గత ఎన్నికల్లో గుణ, ఛిండ్వారా మినహా 27 స్థానాలను ఊడ్చిపారేసింది భాజపా. గుణ, ఛిండ్వారాలో మాత్రం ఇప్పటివరకు కాషాయ జెండా ఎగరలేదు. కాంగ్రెస్ ప్రముఖులు కమల్నాథ్, జ్యోతిరాదిత్య సింధియా సొంత నియోజకవర్గాలు కావటం వల్ల అవి మిగిలాయి. కమల్నాథ్ ఛిండ్వారాలో 1980 నుంచి పది సార్లు ఎంపీగా గెలిచారు. మధ్యలో ఒకసారి 1997 ఉపఎన్నికల్లో భాజపా నేత సుందర్ లాల్ పాత్వా గెలిచారు.
కమల్నాథ్ ఇప్పుడు ముఖ్యమంత్రి. రాష్ట్ర రాజకీయాలకే పరిమితం. ఛిండ్వారా లోక్సభ నియోజకవర్గంలో ఆయన విజయపరంపరను కాంగ్రెస్ కొనసాగించగలదా లేదా అన్నదే ప్రశ్న.
ఇవీ చూడండి:
2002 నుంచి వరుసగా 4 సార్లు గుణ ఎంపీగా గెలిచారు సింధియా. ఆయన్ను ఎదుర్కోవడం భాజపా ముందున్న సవాలు.
14 స్థానాలు.. 15 ఏళ్లు
భోపాల్, ఇండోర్, విదిశ, మోరెనా, భిండ్, సాగర్, టికమ్గఢ్, దామో, ఖజురహో, సట్నా, జబల్పూర్, బాలాఘాట్, బెటుల్, రెవాలో 15 ఏళ్లలో ఒక్కసారైనా గెలవలేదు కాంగ్రెస్. రెవా మినహా అన్ని స్థానాల్లో భాజపా 15 ఏళ్లుగా ఓటమే ఎరుగదు.
ప్రస్తుతం రాష్ట్రంలోని 9 స్థానాలు కమలదళానికి కంచుకోటలుగా ఉన్నాయి. ఈ పరిస్థితిని మార్చేందుకు కాంగ్రెస్ తీవ్ర ప్రయత్నాలు చేస్తోంది.
"మధ్యప్రదేశ్లో మోదీ పట్ల వ్యతిరేకత పెరిగింది. అది మాకు ఎక్కువ స్థానాలు తీసుకొస్తుంది. ఆ దిశగానే మేము కృషి చేస్తున్నాం. భోపాల్, ఇండోర్, విదిశ స్థానాల్లో సీనియర్ నేతలను బరిలో దింపుతాం."
-పంకజ్ ఛతుర్వేది, కాంగ్రెస్ అధికార ప్రతినిధి
శాసనసభ ఎన్నికల్లో ఓటమి ఎదురైనా.... లోక్సభ ఎన్నికల్లో క్లీన్ స్వీప్పై గురిపెట్టింది భాజపా. గుణ, ఛిండ్వారాలోనూ బలమైన అభ్యర్థులను బరిలోకి దించాలని భావిస్తోంది.
