'పేపర్​తో కళాకృతులు.. విదేశాల నుంచి ప్రశంసలు'

తన ప్రతిభతో దేశవ్యాప్తంగా స్నేహితులను చేసుకుంది మలప్పురానికి చెందిన ఓ అమ్మాయి. పేపర్​తో తయారు చేసే కళాకృతులను సామాజిక మాధ్యమాల్లో పోస్ట్ చేసేది. దీంతో, దేశదేశాల నుంచి ఆమెకు ప్రశంసలు వచ్చేవి. కొందరు విదేశీయులతో మరింత సన్నిహితం పెరిగేది. ఈ క్రమంలోనే ఆమె వారికి లేఖలు రాయడం కూడా మొదలెట్టింది. ఇంతకీ ఆమె కథేంటి?..

ఇక్కడ కనిపిస్తున్న ఈ యువతి.. మలప్పురంలోని ఓ ఉన్నత పాఠశాలలో 11వ తరగతి చదువుతోంది. రెస్బిన్ అనే ఈ అమ్మాయికి ప్రపంచవ్యాప్తంగా 43 దేశాల్లో స్నేహితులున్నారు. ఆ ఫ్రెండ్స్ ఫేస్​బుక్​లోనో, ఇన్​స్టాగ్రామ్లోనో కాదు. డిజిటల్ ప్రపంచంలోనూ చేతితో రాసిన లేఖలతోనే ప్రపంచవ్యాప్తంగా సన్నిహితులను ఏర్పరచుకుంది రెస్బిన్. పేపర్​తో తయారుచేసిన కళాకృతులను ఓసారి ఇన్​స్టాలో పోస్ట్ చేయడం ద్వారా ఈ కథంతా మొదలైంది.

మెక్సికోకు చెందిన సారా అనే అమ్మాయి ఆ కళాఖండాలు చూసి ఆసక్తితో రెస్బిన్​తో మాట కలిపింది. అక్కడి నుంచి లేఖల పరంపరకు బీజం పడింది. సారాతో మొదలు పెట్టిన లేఖల మైత్రీబంధాన్ని తర్వాత అమెరికా, జపాన్, బ్రిటన్, ఇండోనేసియా, స్పెయిన్ సహా ఎన్నో దేశాలకు విస్తరించింది రెస్బిన్. ఉత్తరం రాసిన ప్రతిసారి ప్రత్యుత్తరం కోసం ఆసక్తిగా ఎదురుచూస్తుంటుంది. క్షణాల్లో ఈమెయిల్స్, లైవ్ మెసేజెస్ పంపుకునే వీలున్న ఈ రోజుల్లోనూ తనకోసం వచ్చిన లేఖలు మురిసిపోతూ చదువుకుంటుంది.

"నేనో పేపర్ఆర్టిస్టుని. డూడుల్స్ గీస్తాను. డూడుల్స్ గీయడమంటే చాలా ఇష్టం. నాకు బాగా నచ్చినవాటిని ఇన్​స్టాలో పోస్ట్​చేస్తా. అనుకోకుండా ఓరోజు ఓ అమెరికా అమ్మాయి మెసేజ్ చేసింది. నా డూడుల్స్ నచ్చి, చిరునామా పంపమని అడిగింది. ఉత్తరాలు రాస్తుంటా అని చెప్పింది. కొన్ని నెలల తర్వాత ఉత్తరం వచ్చింది, నేనూ ప్రత్యుత్తరం పంపాను. ఆ అనుభూతి బాగా నచ్చింది. ఎన్నో మధుర జ్ఞాపకాలనిస్తోంది ".

- రెస్బిన్, కేరళ.

పోస్ట్​ బాక్సుల శకం దాదాపు ముగిసి, తమ జ్ఞాపకాలు, అనుభవాలను చేతితో రాసిన ఉత్తరాల్లో పంచుకునే రోజులు కనుమరుగై, డిజిటల్ మాధ్యమాలు ఒక్కసారిగా పరిస్థితుల్లో పూర్తి మార్పులు తెచ్చాయి. అక్షరాల స్థానంలో ఎమోజీలు వచ్చిచేరాయి. ఇలాంటి కాలంలో చేత్తో రాసిన లేఖలతో ప్రపంచవ్యాప్తంగా స్నేహితులను ఏర్పరచుకోవడం తనకు ఎంతో ఉల్లాసాన్నిస్తోందని చెబుతోంది రెస్బిన్.

"ఇప్పటివరకూ 45 మంది స్నేహితుల నుంచి 60 కి పైగా లేఖలు నాకు వచ్చాయి. నా స్నేహితులు 43 దేశాల్లో ఉన్నారు".

-రెస్బిన్

స్నేహితులకు ఉత్తరాలతో పాటు.. చిన్నచిన్న బహుమతులు కూడా పంపుతుంది రెస్బిన్. 43 దేశాల్లోని 15 ఏళ్ల నుంచి, 24 ఏళ్ల వయసున్న వారితో ఆమె స్నేహం చేస్తోంది. సామాజిక మాధ్యమాల్లో కాకుండా, ఇలా స్నేహితులను చేసుకోవడం భలే ఉంది కదూ..!

ఇదీ చదవండి:డాక్టర్​ అవతారంలో దుర్గామాత.. క్రియేటివిటీకి థరూర్ ఫిదా