భాజపాలోకి 107 మంది ఎమ్మెల్యేలు: ముకుల్​

పశ్చిమ బంగలో వివిధ పార్టీల నుంచి 107 మంది ఎమ్మెల్యేలు భారతీయ జనతా పార్టీలో చేరనున్నారని ఆ పార్టీ సీనియర్​ నాయకుడు ముకుల్​ రాయ్​ తెలిపారు. ఎక్కువ మొత్తంలో తృణమూల్​ కాంగ్రెస్​ నుంచి వలసలు ఉండనున్నాయన్నారు.

కర్ణాటక, గోవా రాష్ట్రాల్లో రాజకీయ సంక్షోభం కొనసాగుతోన్న తరుణంలో బంగాల్​లో భారీ స్థాయిలో వలసలు ఉండబోతున్నాయని సంచలన వ్యాఖ్యలు చేశారు భాజపా సీనియర్​ నాయకుడు ముకుల్​ రాయ్​. రాష్ట్రంలోని వివిధ పార్టీలకు చెందిన 107 మంది కాషాయ పార్టీ తీర్థం పుచ్చుకోనున్నారని వెల్లడించారు.

ముఖ్యమంత్రి మమత బెనర్జీ నేతృత్వంలోని ప్రభుత్వంపై పలువురు టీఎమ్​సీ జిల్లా స్థాయి, రాష్ట్ర స్థాయి నాయకులు నమ్మకం కోల్పాయారని తెలిపారు రాయ్​.

" దాదాపు 107 మంది ఎమ్మెల్యేలు మాతో టచ్​లో ఉన్నారు. అందులో ఎక్కువ మంది టీఎంసీ నాయకులే. కాంగ్రెస్, సీపీఎం నుంచి కొందరు ఉన్నారు. వారు త్వరలోనే కాషాయ పార్టీలో చేరాలని అనుకుంటున్నారు."

- ముకుల్​ రాయ్​, భాజపా సీనియర్​ నాయకుడు.

పలువురు టీఎమ్​సీ కౌన్సిలర్లు భాజాపాలో చేరి తిరిగి సొంత పార్టీకి వచ్చిన క్రమంలో ఈ వ్యాఖ్యలు చేశారు రాయ్​.

లోక్​సభ ఎన్నికల్లో బంగాల్​లో 42 స్థానాలకు గాను భాజపా 18 సీట్లు గెలుపొందింది. అనంతరం ఆరుగురు టీఎమ్​సీ.. కాంగ్రెస్​, సీపీఎంల నుంచి తలా ఒక ఎమ్మెల్యే భాజపా పార్టీ తీర్థం పుచ్చుకున్నారు.