Bengaluru Notorious robber Arrest: జేబుదొంగ పాత్రలను సినిమాల్లో చూసి ఉంటాం. ఎలాంటి పరిస్థితుల్లోనైనా చాకచక్యంగా దొంగతనం చేస్తుంటారు పాత్రధారులు. పోలీసుల అరెస్టులు, బెయిల్పై విడుదలై మళ్లీ అదే పనిగా దొంగతనం చేయడం.. అదో వృత్తిగా భావిస్తారు. ఇలాంటి పాత్రల నుంచి స్ఫూర్తి పొందాడో ఏమో.. కర్ణాటక, బెంగళూరుకు చెందిన ఓ దొంగ నిజజీవితంలో అచ్చం అలానే మారిపోయాడు. 80 కేసుల్లో నిందితునిగా ఉన్న అతన్ని బెంగళూరు పోలీసులు శనివారం పట్టుకున్నారు. అతడ్ని అరెస్టు చేయడం ఇది 17వసారి కావడం గమనార్హం.
Escape Karthik Arrest in Bengaluru: నిందితున్ని కార్తిక్ కుమార్గా పోలీసులు తెలిపారు. నిందితుడు 2005లో 16వ ఏట మొదటిసారి దొంగతనం చేశాడని చెప్పారు. అప్పటి నుంచి వరుస దొంగతనాలకు అలవాటు పడ్డాడని తెలిపారు. రెండుసార్లు కస్టడీ నుంచి కూడా తప్పించుకుని 'ఎస్కేప్ కార్తిక్'గా చలామణి అవుతున్నాడని వెల్లడించారు.