బంగాల్ గవర్నర్​ను కలిసిన కేంద్ర బృందం

బంగాల్ హింసపై నిజనిర్ధరణ కోసం కేంద్రం ఏర్పాటు చేసిన బృందం సభ్యులు ఆ రాష్ట్ర గవర్నర్​ను కలిశారు. గురువారం బంగాల్​కు చేరుకున్న వీరు.. ఘర్షణ జరిగిన ప్రాంతాలను సందర్శించారు. దీనిపై నివేదిక ఇవ్వాలని గవర్నర్​ను కోరారు. మరోవైపు, బంగాల్ హింసపై భాజపా లక్ష్యంగా శివసేన విమర్శలు చేసింది.

అసెంబ్లీ ఎన్నికల ఫలితాల అనంతరం బంగాల్​లో చెలరేగిన హింసపై కేంద్రం ఏర్పాటు చేసిన నిజనిర్ధరణ బృందం సభ్యులు ఆ రాష్ట్ర గవర్నర్​ జగ్​దీప్ ధన్​ఖడ్​​ను కలిశారు. రాజ్​భవన్​లో గవర్నర్​తో మాట్లాడి నివేదికను అందించాలని కోరారు.

కేంద్ర హోంశాఖ అదనపు కార్యదర్శి నేతృత్వంలోని ఈ బృందం గురువారమే బంగాల్​కు చేరుకున్నారు. రాష్ట్ర సీఎస్, హోం కార్యదర్శి, డీజీపీలతో సమావేశమయ్యారు. దక్షిణ, ఉత్తర 24 పరగణాల జిల్లాల్లో పర్యటించి... బాధితుల కుటుంబ సభ్యులు, స్థానికులతో మాట్లాడారు.

16 మంది మృతి

మే 2 తర్వాత రాష్ట్రంలో శాంతి భద్రతల పరిస్థితిపై నివేదిక అందించాలని బంగాల్ గవర్నర్​ను కేంద్రం కోరింది. హింసకు కారణాలను శోధించాలని నలుగురు సభ్యులతో ఓ బృందాన్ని ఏర్పాటు చేసింది. ఈ హింసలో 16మంది మరణించారని రాష్ట్ర ముఖ్యమంత్రి మమతా బెనర్జీ తెలిపారు. టీఎంసీ వర్గాలే దాడులకు పాల్పడ్డాయని భాజపా ఆరోపించగా.. వాటిని దీదీ కొట్టిపారేశారు. భాజపా గెలిచిన ప్రాంతాల్లోనే ఘర్షణలు జరిగాయని తిప్పికొట్టారు.

భాజపాపై శివసేన ఫైర్

మరోవైపు, ఈ హింసపై శివసేన తీవ్రంగా శుక్రవారం స్పందించింది. బంగాల్ రాజకీయాల నెత్తుటి పార్శ్వాన్ని ఈ ఘటనలు తేటతెల్లం చేస్తున్నాయని వ్యాఖ్యానించింది. రాష్ట్రంలో శాంతి భద్రతలు కాపాడే బాధ్యత సీఎం మమతా బెనర్జీతో పాటు కేంద్రంపైనా ఉందని పేర్కొంది. ఈ ఘటనల వెనక ఎవరి హస్తం ఉందో తెలియాలని డిమాండ్ చేసింది.

ఎన్నికల్లో భాజపా ఓడిపోయిందనే విషయం తెలియగానే హింస చెలరేగిందని శివసేన పేర్కొంది. టీఎంసీ కార్యకర్తలు భాజపా వర్గాలపై దాడి చేశాయన్న వార్తలు తప్పుడు ప్రచారాలేనని తన సామ్నా పత్రికలో రాసుకొచ్చింది. మరణించిన వారిలో భాజపా, టీఎంసీ కార్యకర్తలు ఉన్నారని, దీనర్థం ఇరుపక్షాలు ఈ హింసలో పాలుపంచుకున్నట్లేనని పేర్కొంది. పరిస్థితిపై గవర్నర్​కు ప్రధాని ఫోన్ చేసి మాట్లాడటం, మమతను బాధ్యురాలిగా చేస్తూ భాజపా నేత హైకోర్టులో వ్యాజ్యం దాఖలు చేయడాన్ని చూస్తే.. భాజపా కపట నాటకం అర్థమవుతోందని రాసుకొచ్చింది.

ఇదీ చదవండి:బంగాల్​లో కేంద్ర మంత్రి కాన్వాయ్​పై దాడి