బంగాల్లో అధికార తృణమూల్ కాంగ్రెస్కు చెందిన 38 మంది శాసనసభ్యులు భాజపాతో టచ్లో ఉన్నారని అన్నారు ఆ పార్టీ నేత, నటుడు మిథున్ చక్రవర్తి. మహారాష్ట్రలో ఏక్నాథ్ శిందే వర్గం, భాజపా కలిసి ప్రభుత్వం ఏర్పాటు చేసిన తరహా పరిస్థితులు.. బంగాల్లోనూ రావచ్చని కోల్కతాలో జోస్యం చెప్పారు.
"టీఎంసీకి చెందిన కనీసం 38 మంది ఎమ్మెల్యేలు భాజపాతో టచ్లో ఉన్నారు. వారిలో 21 మంది నాతో వ్యక్తిగతంగా సంప్రదింపులు జరుపుతున్నారు. మహారాష్ట్రలో శివసేన(ఏక్నాథ్ శిందే వర్గం), భాజపా కలిసి ప్రభుత్వం ఏర్పాటు చేశాయని నేను ముంబయిలో ఉండగా పత్రికలో చదివాను. ప్రస్తుతం భాజపా దేశంలోని 18 రాష్ట్రాల్లో అధికారంలో ఉంది. మరికొన్ని రాష్ట్రాల్లోనూ కాషాయ జెండా అతి త్వరలోనే రెపరెపలాడుతుంది. బంగాల్లో భాజపా తన పోరాటం ఆపదు. ఇప్పటికిప్పుడు రాష్ట్రంలో నిష్పాక్షికంగా ఎన్నికలు నిర్వహిస్తే.. భాజపా ప్రభుత్వం ఏర్పాటు చేయడం తథ్యం" అని చెప్పారు మిథున్.
గతేడాది బంగాల్ శాసనసభ ఎన్నికలకు ముందు భాజపాలో చేరారు మిథున్. ఆ ఎన్నికల్లో టీఎంసీ గెలిచింది. మొత్తం 294 సీట్లున్న బంగాల్ అసెంబ్లీలో టీఎంసీకి 216 మంది సభ్యులు ఉన్నారు. భాజపా తరఫున 75 మంది గెలిచారు. అయితే.. వీరిలో ఐదుగురు ఎమ్మెల్యే పదవులకు రాజీనామా చేయకుండానే అధికార పక్షంలో చేరారు.
మభ్య పెట్టే ముచ్చట్లు:మిథున్ చక్రవర్తి వ్యాఖ్యల్ని తోసిపుచ్చింది టీఎంసీ. వాస్తవికతకు, ఆయన ప్రకటనకు ఏమాత్రం సంబంధం లేదని.. ఇదంతా ప్రజల్ని మభ్యపెట్టే యత్నమని మండిపడింది. అసత్య ప్రకటనలతో ఆయన జనాన్ని తప్పుదోవ పట్టించేందుకు యత్నిస్తున్నారని ధ్వజమెత్తింది.
మరోవైపు.. ఎస్ఎస్సీ కుంభకోణంలో బంగాల్ మంత్రి పార్థా ఛటర్జీ అరెస్టు నేపథ్యంలో కీలక వ్యాఖ్యలు చేశారు టీఎంసీ అధినేత్రి, ముఖ్యమంత్రి మమతా బెనర్జీ. "భాజపాకు పని ఏమీ లేదు. 3-4 సంస్థల్ని అడ్డం పెట్టుకుని రాష్ట్ర ప్రభుత్వాల్ని కూల్చడమే వారి పని. మహారాష్ట్రను అలానే దక్కించుకున్నారు. ఇప్పుడు ఝార్ఖండ్లో చేస్తున్నారు. కానీ.. బంగాల్ వారిని ఓడించింది. బంగాల్ను దక్కించుకోవడం అంత సులువు కాదు. ఎందుకంటే మీరు ముందుగా రాయల్ బంగాల్ టైగర్తో పోరాడాలి" అని కోల్కతాలో అన్నారు మమత. 2024లో కేంద్రంలో భాజపా తిరిగి అధికారంలోకి రాదని జోస్యం చెప్పారు.
