'మీ ఓటు అభివృద్ధికా? సిండికేట్లకా?'

బంగాల్ ప్రజలు ఓటును అభివృద్ధికి వేస్తారో లేక సిండికేట్లకు వేస్తారో తెల్చుకోవాలని భాజపా జాతీయ అధ్యక్షుడు జేపీ నడ్డా అన్నారు. 'లోకో సోనార్​ బంగ్లా' అనే కార్యక్రమాన్ని ప్రారంభించిన ఆయన అవినీతి, సిండికేట్​ను ప్రధానాస్త్రాలుగా చేసుకుని తృణమూల్​ కాంగ్రెస్​ పై విమర్శలు చేశారు.

బంగాల్​లో అసెంబ్లీ ఎన్నికలు సమీపిస్తోన్న నేపథ్యంలో అధికార తృణమూల్​ కాంగ్రెస్​పై భాజపా విమర్శల దాడి పెంచింది. రాష్ట్ర ప్రజలు అభివృద్ధివైపు ఉంటారో.. లేక కమీషన్​ల ప్రభుత్వంవైపు నిలుస్తారో తేల్చుకోవాలని భాజపా జాతీయ అధ్యక్షుడు జేపీ నడ్డా సూచించారు.

పార్టీ మేనిఫెస్టోకు సంబంధించి 'లోకో సోనార్​ బంగ్లా( బంగారు బంగాల్​ సాధించటమే లక్ష్యం)' అనే కార్యక్రమాన్ని కోల్​కతాలో ప్రారంభించిన నడ్డా ఈ వ్యాఖ్యలు చేశారు. బంగాల్​లో జన్మించిన ప్రముఖులను, మహిళలను మమత ప్రభుత్వం నిర్లక్ష్యం చేసిందని మండిపడ్డారు. తమ పార్టీ మేనిఫెస్టోలో మటువా వర్గం, మహిళలు, యువతకు పెద్ద పీట వేసి.. వారి సామాజిక, ఆర్థిక స్వావలంబనకు కృషి చేస్తామని తెలిపారు. కట్​ మనీ, సిండికేట్​ల సంస్కృతిని అంతం చేస్తామని పేర్కొన్నారు.

'లోకో సోనార్​ బంగ్లా' ద్వారా ప్రజల నుంచి సలహాలు స్వీకరిస్తామని అన్నారు నడ్డా. ఈ కార్యక్రమం మార్చి 3వ తేదీన మొదలై.. అదే నెల 30 వరకు కొనసాగుతుందని వెల్లడించారు.

"ప్రజల నుంచి సలహాలు స్వీకరించేందుకు బంగాల్​ వ్యాప్తంగా 30,000 పైగా సలహా పెట్టెలను ఏర్పాటు చేస్తాం. ప్రజలు డిజిటల్ వేదికగా కూడా వారి సలహాలు అందించవచ్చు. ఇందులో ప్రజల భాగస్వామ్యం అవసరం. అవినీతిని, సిండికేట్​ వ్యవస్థను, బొగ్గు అక్రమ రవాణాను, కట్​ మనీ సంస్కృతిని అంతం చేసే దిశగా ఈ కార్యక్రమం కొనసాగుతుంది. బంగాల్​కు ఉన్న విస్తృత అవకాశాలను ప్రభుత్వాలను ఉపయోగించుకోలేకపోయాయి. వాటిని భాజపా తిరిగి తీసుకురావాలని కోరుకుంటోంది."

-జేపీ నడ్డా, భాజపా జాతీయ అధ్యక్షుడు

పార్టీ అధికారంలోకి వస్తే ఏడవ వేతన సంఘం సిఫార్సులను అమలు చేస్తామని నడ్డా హామీ ఇచ్చారు. కేంద్రంలో తమ ప్రభుత్వం ఉండడం వల్ల రాష్ట్రాభివృద్ధి మరింత సులభం అవుతుందని తెలిపారు.