గవర్నర్​పై సీఎం అవినీతి ఆరోపణలు

బంగాల్​ ముఖ్యమంత్రి మమతా బెనర్జీ, గవర్నర్​ జగదీప్​ ధన్​కర్​ మధ్య వివాదం తారస్థాయికి చేరింది. గవర్నర్​పై తీవ్ర అవినీతి ఆరోపణలు చేశారు మమత. ఆయనను తొలగించాలని మరోసారి డిమాండ్ చేశారు.

బంగాల్​ గవర్నర్ జగదీప్​ ధన్​కర్, సీఎం మమతా బెనర్జీ మధ్య మరోసారి తీవ్ర వివాదం చెలరేగింది. గవర్నర్​ అవినీతిపరుడని ఆరోపించారు మమత. 1996 నాటి హవాలా కేసులో ఆయన నిందితుడని చెప్పారు. ధన్​కర్​ ఇటీవల ఉత్తర బంగాల్ పర్యటన ఎందుకు చేశారో తెలపాలని డిమాండ్ చేసిన మమత.. ఆ ప్రాంతాన్ని విడదీసే కుట్ర జరుగుతోందని అన్నారు.

"జగదీప్​ ధన్​కర్ అవినీతిపరుడు. 1996 హవాలా జైన్​ కేసు ఛార్జిషీట్​లో ఆయన పేరుంది. శిక్ష నుంచి కోర్టు ఆయనకు తాత్కాలిక ఉపశమనం కల్పించిన తర్వాత.. ఈ వ్యవహారానికి సంబంధించిన పలు కేసుల్లో ఆయన పేరు ఉంది. ప్రస్తుతం అవి పెండింగ్​లో ఉన్నాయి. అలాంటి వ్యక్తిని గవర్నర్​గా కేంద్ర ప్రభుత్వం ఎందుకు కొనసాగిస్తోంది? భాజపా అవినీతి పార్టీ. అది అవినీతిపరులకు ఆశ్రయమిస్తుంది."

- మమతా బెనర్జీ, బంగాల్ సీఎం

బంగాల్​ను​ విడదీసే కుట్ర..

ధన్​కర్​ ఉత్తర బంగాల్​ పర్యటన పొలిటికల్​ స్టంట్​ అని మమత అన్నారు. ఎందుకంటే అక్కడ ఆయన కేవలం భాజపా ఎమ్మెల్యేలు, ఎంపీలనే కలిశారని చెప్పారు. "అకస్మాత్తుగా ఉత్తర బంగాల్​కు గవర్నర్​ ఎందుకు వెళ్లారు? ఉత్తర బంగాల్​ను విడదీసే కుట్ర జరుగుతోందని నాకు అనుమానంగా ఉంది." అని మమత ఆరోపించారు. ధన్​కర్​ను తొలగించడానికి కేంద్రానికి ఎన్నోసార్లు లేఖ రాసినట్లు తెలిపారు.

నాపై ఎలాంటి ఛార్జిషీట్​ లేదు..

అయితే ఈ ఆరోపణలను ధన్​కర్​ కొట్టిపారేశారు. "నాపై ఎలాంటి ఛార్జిషీట్​ నమోదు కాలేదు. ఇవన్నీ తప్పుడు ఆరోపణలు. ఒక సీనియర్​ నేత నుంచి నేను ఇది ఊహించలేదు. హవాలా కేసులో నేను ఏ కోర్టు నుంచి స్టే తీసుకోలేదు. ఎందుకంటే అసలు అలాంటి కేసే లేదు. నేను ఎట్టిపరిస్థితుల్లో భయపడను. బంగాల్​ ప్రజలకు సేవ చేయడానికి నేను చేయగలిగిందల్లా చేస్తాను." అని గవర్నర్​ అన్నారు.

ఏమిటీ కేసు?

1990లలో జైన్ హవాలా కేసు వెలుగులోకి వచ్చింది. మాధవరావు సింధియా, ఎల్​కే అడ్వాణీ, వీసీ శుక్లా, దేవీలాల్, శరద్​ యాదవ్, బల్​రామ్ జకార్, మదన్​లాల్​ ఖురానా సహ పలువురు ప్రముఖ నేతలు నిందితులుగా ఉన్నారు. సురిందర్ జైన్, ఆయన సోదరుల నుంచి వారికి అక్రమంగా ఆర్థిక ప్రయోజనాలు చేకూరాయనేది ప్రధాన ఆరోపణ.

ఇవీ చూడండి: