బిర్యానీలో బీరు సీసా ముక్కలు!

బిర్యానీ తినేందుకు కుటుంబంతో హోటల్​కు వెళ్లిన ఓ వ్యక్తికి చేదు అనుభవం ఎదురైంది. బిర్యానీ తింటుండగా.. సీసా ముక్క గుచ్చుకుంది. దీంతో ఆందోళన వ్యక్తం చేసిన అతను కోర్టును ఆశ్రయించగా.. పరిహారం ఇవ్వాలని హోటల్​ యజమానికి ఆదేశించింది. కేరళలో జరిగింది ఈ ఘటన.

కేరళ పతనంతిట్ట జిల్లాలో నాలుగేళ్ల క్రితం ఓ వ్యక్తి తిన్న బిర్యానీకి కోర్టు ఇప్పుడు పరిహారం ఇప్పించింది. కోర్టు ఖర్చులు సహా రూ.12వేలు పరిహారాన్ని చెల్లించాలని హోటల్ యజమాన్యాన్ని ఆదేశించింది వినియోగదారుల వివాదాల పరిష్కార కమిషన్.

అసలేమైందంటే..?

తిరువళ్లకు చెందిన శైలేష్ ఊమెన్.. 2017లో తన కుటుంబంతో కలిసి ఓ హోటల్​కు వెళ్లాడు. బిర్యానీ ఆర్డర్ చేశాడు. బిర్యానీ రాగానే ఆవురావురమంటూ.. తినడం మొదలు పెట్టాడు. ఈ క్రమంలోనే శైలేష్​ నోటికి ఏదో గుచ్చినట్లు అనిపించింది. చూస్తే బీరు సీసా ముక్క కనిపించింది. వెంటనే హోటల్​ యజమానికి సమాచారం అందించి.. ఆస్పత్రికి వెళ్లాడు. అప్పట్లో దీనిపై స్పందించిన హోటల్ యజమాని.. ఇలాంటివి జరగడం సాధారణమని వ్యాఖ్యానించాడు.

దీంతో హోటల్​ యాజమాన్యంపై వినియోగదారుల కోర్టులో పిటిషన్​ దాఖలు చేశాడు శైలేష్​. దీనిపై విచారణ జరిపిన వినియోగదారుల వివాదాల పరిష్కార కమిషన్.. రూ.10,000 పరిహారంతో పాటు రూ.2,000 కోర్టు ఖర్చులకు కస్టమర్​కు(శైలేష్​) చెల్లించాలని హోటల్ యజమాన్యాన్ని ఆదేశించింది.

ఇదీ చూడండి:పెసర పునుగుల పులుసు.. రుచి చూశారా?