హరియాణాకు, క్రీడలకు ప్రత్యేక అనుబంధముంది. దేశానికి దిగ్గజ క్రీడాకారులను అందించిన రాష్ట్రాల్లో హరియాణా ఒకటి. క్రీడలు, క్రీడాకారులను ప్రోత్సహించడంపై ఈ రాష్ట్రం ప్రత్యేక దృష్టి పెడుతుంది. ఇక్కడి యువతలో ఎక్కువ శాతం స్పోర్ట్స్ కోటాలో ఉద్యోగాలు సాధించినవాళ్లే. హరియాణాలోని కొన్ని గ్రామాలు ఫుట్‌బాల్‌కు, మరికొన్ని బాక్సింగ్‌కు, ఇంకొన్ని గ్రామాలు కబడ్డీ ఆటలకు ప్రసిద్ధి. పానిపత్‌ నుంచి 28 కిలోమీటర్ల దూరంలో ఉన్న అహర్.. బాస్కెట్‌బాల్‌ను ప్రేమించే ఓ ఊరు.
"2012లో బాస్కెట్బాల్ ఆడడం ప్రారంభించాను. ఇప్పటివరకు 15 సార్లు జాతీయస్థాయి పోటీల్లో పాల్గొన్నాను. మొత్తంగా 5 పతకాలు సాధించాను. ప్రస్తుతం భారత సైన్యంలో పనిచేస్తున్నా."
- సావన్, సైనికుడు
ఊరంతా జాతీయ, అంతర్జాతీయ స్థాయి ఆటగాళ్లే కనిపిస్తారు. దేశం కోసం ఆడి, స్పోర్ట్స్ విభాగంలో సైన్యంలో చేరినవారూ చాలామందే ఉన్నారు. సర్వీసు నుంచి పదవీ విరమణ పొందిన ఆటగాళ్లనూ ఊర్లో చూడొచ్చు.
"జాతీయస్థాయి పోటీల్లో చాలాసార్లు పాల్గొన్నా. ఆ తర్వాత స్పోర్ట్స్ కోటా ద్వారా భారత సైన్యంలో చేరా. 22 ఏళ్లపాటు సేవలందించిన తర్వాత పదవీ విరమణ పొందా. మా ఊర్లోని ఈతరం బాస్కెట్ బాల్ ఎంతో ఇష్టంగా ఆడుతున్నారు. వాళ్లలో ఎంతోమంది జాతీయస్థాయిలోనూ ఆడారు."
- చంద్‌రామ్, విశ్రాంత సైనికుడు
బాస్కెట్బాల్ కోసమే ఈ గ్రామ ప్రజలు ప్రత్యేక సంప్రదాయం పాటిస్తున్నారు. దేశం తరఫున ఆడి, పతకాలు తేవడం ప్రారంభమైన దగ్గర్నుంచీ పుట్టిన ప్రతి బిడ్డా ఆటగాడు కావాలని ఆశీర్వదిస్తూ పీలియా అనే వేడుక నిర్వహిస్తారు. ఆ సమయంలో శిశువులకు బాస్కెట్‌బాల్‌నే కానుకగా ఇస్తారు బంధువులు.
"మా ఊర్లో ఎక్కువగా ఆడే ఆట బాస్కెట్బాల్. పీలియా వేడుక సమయంలో శిశువులకు బంధువులు బాస్కెట్‌బాల్‌నే కానుకగా ఇస్తారు."