తెలుగు రాష్ట్రాల ప్రయాణికులకు గుడ్ న్యూస్ - అయోధ్యకు ప్రత్యేక రైళ్లు

Ayodhya Ram Mandir Opening 2024 : అయోధ్య రామమందిరం ప్రారంభోత్సవానికి సమయం దగ్గర పడుతోంది. ఈ సందర్భంగా తెలుగు రాష్ట్రాల నుంచి అయోధ్యకు ప్రత్యేక రైళ్లను నడిపాలని రైల్వే శాఖ నిర్ణయించింది. దీనికి సంబంధించి ప్రణాళికలు రూపొందించినట్లు రైల్వే శాఖ వర్గాలు వెల్లడించాయి.

Ayodhya Ram Mandir Opening 2024 : ఓ వైపు ప్రస్తుతం దేశమంతటా రామ నామ స్మరణ విశేషంగా జరుగుతోంది. మరోవైపు అయోధ్యలో శ్రీరాముడి విగ్రహ ప్రాణప్రతిష్ఠకు (Ayodhya Ram Mandir) సంబంధించిన క్రతువులు కొనసాగుతున్నాయి. భారతీయ సంస్కృతి ప్రతిబింబించేలా నాగర శైలిలో, అష్టభుజి ఆకారంలో గర్భగుడిని తీర్చిదిద్దారు. ఈ నెల 22న ప్రాణప్రతిష్ఠ కార్యక్రమాన్ని నిర్వహించనున్నారు. ఆరోజు మధ్యాహ్నం 12 గంటల 20 నిమిషాల నుంచి ఒంటి గంట వరకు బాల రాముడి విగ్రహ ప్రతిష్ఠాపన కార్యక్రమం, ప్రధాని నరేంద్ర మోదీ చేతుల మీదుగా జరగనుంది. జనవరి 21, 22 తేదీల్లో అయోధ్య ఆలయానికి సామాన్య భక్తులకు అనుమతి లేదని శ్రీరామ జన్మభూమి తీర్థక్షేత్ర ట్రస్టు ఇప్పటికే తెలిపింది. 23 నుంచి భక్తులకు రామ్‌లల్లా దర్శన భాగ్యం కల్పిస్తామని ప్రకటించింది.

తెలుగు రాష్ట్రాల నుంచి పెద్ద సంఖ్యలో ప్రత్యేక రైళ్లు :మరోవైపు రానున్న రోజుల్లో అయోధ్యకు రద్దీ పెరగనున్న నేపథ్యంలో, తెలుగు రాష్ట్రాల నుంచి పెద్ద సంఖ్యలో ప్రత్యేక రైళ్లు (Special Trains Ayodhya) నడిపేందుకు రైల్వే శాఖ ప్రణాళికలు రూపొందించింది. తెలంగాణలోని కాజీపేట, సికింద్రాబాద్‌ రైల్వేస్టేషన్ల నుంచి అయోధ్య స్టేషన్‌కు ప్రత్యేక రైళ్లు రాకపోకలు సాగించనున్నాయి. ఆంధ్రప్రదేశ్‌లోని రాజమహేంద్రవరం, సామర్లకోట, విజయవాడ, గుంటూరు స్టేషన్ల నుంచి అయోధ్యకు ప్రత్యేక రైళ్లను రైల్వే శాఖ నడపనుంది.

Special Trains From Telugu States to Ayodhya : సికింద్రాబాద్‌ - అయోధ్య ప్రత్యేక రైళ్లు జనగామ, కాజీపేట, పెద్దపల్లి, రామగుండం, మంచిర్యాల మీదుగా రాకపోకలు సాగిస్తాయి. విజయవాడ - అయోధ్య రైళ్లు ఏలూరు, తాడేపల్లిగూడెం, రాజమహేంద్రవరం, అనపర్తి, సామర్లకోట, అన్నవరం, తుని, విశాఖపట్నం, విజయనగరం, శ్రీకాకుళం రోడ్‌ రైల్వేస్టేషన్ల మీదుగా రాకపోకలు సాగిస్తాయి.

ఈ నెల 29 నుంచి అయోధ్యకు ప్రత్యేక రైళ్లు :

• సికింద్రాబాద్‌ నుంచి అయోధ్య ప్రత్యేక రైళ్లు జనవరి 29, 31 ఫిబ్రవరి 2, 5, 7, 9, 11, 13, 15, 17, 19, 21, 23, 25 తేదీల్లో సాయంత్రం 4:45 గంటలకు బయల్దేరనున్నాయి. అయోధ్య నుంచి సికింద్రాబాద్‌కు తిరుగుప్రయాణం అవుతాయి.
• కాజీపేట నుంచి అయోధ్యకు జనవరి 30, ఫిబ్రవరి 1, 3, 6, 8, 10, 12, 14, 16, 18, 20, 22, 24, 26, 28 తేదీల్లో సాయంత్రం 6:20 గంటలకు బయల్దేరుతాయి. ఈ రైళ్లు అయోధ్య నుంచి తిరిగి కాజీపేటకు చేరుకుంటాయి.
• గుంటూరు నుంచి జనవరి నుంచి 31న, విజయవాడ నుంచి ఫిబ్రవరి 4న, రాజమహేంద్రవరం నుంచి ఫిబ్రవరి 7న సామర్లకోట నుంచి ఫిబ్రవరి 11న ప్రత్యేక రైళ్లు అయోధ్యకు పయనమవుతాయి. అయోధ్య నుంచి తిరిగి ఆయా చోట్లకు చేరుకోనున్నాయి.