Auto Driver Stock Market Trading : ముంబయికి చెందిన 24 ఏళ్ల విశాల్ పైక్రావ్ ఆటో నడుపుతూనే స్టాక్ మార్కెట్లో ట్రేడింగ్ చేస్తున్నాడు. ఫుల్ టైమ్ ట్రేడింగ్ చేసేందుకు 2019లో కొరియర్ సంస్థలో ఉద్యోగం మానేశాడు విశాల్. అయితే, మరో ఆదాయ మార్గం కూడా ఉండాలన్న ఆలోచనతో ఆటో డ్రైవర్గా మారాడు.
యూట్యూబ్ పాఠాలు- చిన్న మొత్తంలో పెట్టుబడి
'నేను ఎప్పటినుంచో ట్రేడింగ్ చేస్తున్నా. ఉద్యోగం చేసేటప్పుడు ట్రేడింగ్కు సరిపడా సమయం ఉండేది కాదు. ఫుల్ టైమ్ ట్రేడింగ్ మొదలుపెట్టాక నాకు మరో ఆదాయ మార్గం కూడా ఉండాలని అర్థమైంది. ట్రేడింగ్ మొదలుపెట్టాక తొలి మూడేళ్లు భారీ లాభాలు ఆశించకూడదు. బతికేందుకు మరో ఆదాయం కూడా ఉండాలి. అందుకే ఆటో నడుపుతున్నా' అని చెప్పాడు విశాల్. ఇక యూట్యూబ్ వీడియోలు చూసి, చిన్నమొత్తంలో పెట్టుబడి పెట్టి ట్రేడింగ్ నేర్చుకున్నానని అతడు తెలిపాడు.
"2019లో స్టాక్ మార్కెట్ గురించి తెలుసుకున్నా. భారీగా డబ్బు సంపాదించేందుకు స్టాక్ మార్కెట్ ఓ మార్గం అని అర్థం చేసుకున్నా. అసలు స్టాక్ మార్కెట్ అంటే ఏంటో, షేర్స్ ఎలా కొనాలో నేర్చుకున్నా. అలా ట్రేడింగ్ గురించి మొత్తం తెలుసుకున్నా. చాలా మందికి అసలు ట్రేడింగ్ అంటే ఏంటో తెలియదు. వాళ్లు తమ గమ్యస్థానాలకు చేరితే చాలని అనుకుంటారు. ఆటోలోని చార్ట్స్ చూసినా పెద్దగా పట్టించుకోరు. ట్రేడింగ్ గురించి తెలిసిన కొందరు మాత్రం ఇవి ఎందుకు పెట్టావని అడుగుతారు. నేను ఆటోలోనే ట్రేడింగ్ చేస్తానని చెబుతాను. వారు షాక్ అవుతారు. అన్ని వివరాలు అడుగుతారు. ఇన్నేళ్లుగా నేను నేర్చుకున్నవన్నీ వారికి చెబుతాను."
- విశాల్ పైక్రావ్, ఆటో డ్రైవర్