Ashish Mishra Bail: లఖింపుర్ ఖేరీ హింసాత్మక ఘటనలో ప్రధాన నిందితుడు, కేంద్ర మంత్రి అజయ్ మిశ్రా తనయుడికి బెయిల్ లభించింది. అలహాబాద్ హైకోర్టు లఖ్నవూ బెంచ్.. అతడికి బెయిల్ మంజూరు చేసింది. దీంతో ఆశిష్ మిశ్రా విడుదల కానున్నారు.
ఉత్తర్ప్రదేశ్లో అసెంబ్లీ ఎన్నికల వేళ మంత్రి తనయుడు విడుదల కానుండటం.. ప్రాధాన్యం సంతరించుకుంది.
ఇదీ జరిగింది..
అక్టోబర్ 3న జరిగిన లఖింపుర్ ఖేరీ ఘటనలో నలుగురు రైతులు సహా ఎనిమిది మంది మరణించారు. నిరసన చేస్తున్న రైతుల పైకి కేంద్ర మంత్రి అజయ్ మిశ్రా కుమారుడు ఆశిష్ మిశ్రా కారు దూసుకెళ్లింది. కారు ఢీకొని నలుగురు రైతులు ప్రాణాలు కోల్పోగా.. అనంతరం చెలరేగిన హింసలో ఓ జర్నలిస్ట్ సహా నలుగురు చనిపోయారు. ఆశిష్ మిశ్రా సహా పలువురిని సిట్ అరెస్టు చేసింది. నిందితులు ప్రస్తుతం లఖింపుర్ ఖేరీ జిల్లా కారాగారంలో ఉన్నారు.
ఈ ఘటనలో ఆశిష్ మిశ్రాపై.. హత్య, హత్యాయత్నం ఆరోపణల కింద అభియోగాలు మోపింది సిట్. ఘటన జరిగినప్పుడు అక్కడే ఉన్నట్లు కోర్టుకు సమర్పించిన ఛార్జిషీట్లో వెల్లడించింది.