ఆన్​లైన్​లో కత్తుల కోసం ఆర్డర్లు- ఆందోళనలో పోలీసులు

ఛత్తీస్​గఢ్​ రాజధానిలో కత్తిపోటు ఘటనలు పెరుగుతున్న తరుణంలో వినియోగదారులకు కత్తులు డెలివరీ చేయవద్దని ఈ-కామర్స్ సంస్థలను కోరారు పోలీసులు. గతేడాది 800 కత్తులను వినియోగదారులు ఆర్డర్ చేశారని.. వీటికి నగరంలో జరిగిన కొన్ని కేసులకు సంబంధాలున్నాయని అధికారులు చెబుతున్నారు.

ఆన్​లైన్​లో వినియోగాదారులు ఆర్డర్​ చేసిన కత్తులను డెలివరీ చేయొద్దని అమెజాన్​, ఫ్లిప్​కార్ట్​ వంటి ఈ-కామర్స్​ సంస్థలను కోరారు ఛత్తీస్​గఢ్​ పోలీసులు. రాష్ట్ర రాజధాని రాయ్​పుర్​లో కత్తిపోటు ఘటనలు పెరుగుతున్న నేపథ్యంలో ఈ విజ్ఞప్తి చేసినట్లు తెలుస్తోంది.

గత కొన్ని నెలలుగా కత్తిపోటు ఘటనలు, మరణాలు పెరిగాయని.. ఈ కేసులకు ఆన్​లైన్​లో కొనుగోలు చేసిన కత్తులతో సంబంధాలున్నాయని అధికారులు పేర్కొన్నారు. ఈ కేసులకు సంబంధించి ఇప్పటికే పలువురి నిందితులను అరెస్టు చేసినట్లు తెలిపారు. వీరిలో ఎక్కువగా మైనర్లే ఉన్నట్లు చెప్పారు.

"రాజధాని నగరంలో పెరుగుతున్న కత్తిపోటు ఘటనలను దృష్టిలో ఉంచుకుని రాయ్​పుర్​ పోలీసులు ఓ ప్రచారాన్ని ప్రారంభించారు. గతేడాది కత్తులను ఆర్డర్​ చేసిన వ్యక్తుల కోసం ఫ్లిప్‌కార్ట్​, అమెజాన్​ వంటి ఆన్‌లైన్​ ఈ-కామర్స్​ సంస్థల నుంచి డేటాను పోలీసులు సేకరించారు. ఈ జాబితా ఆధారంగా 2020లో 800 మంది కత్తులు ఆర్డర్​ చేసినట్లు తేలింది. వీటిలో రాయ్​పుర్​ నుంచి 502, ఇతర జిల్లాల నుంచి 298 ఆర్డర్లు వచ్చినట్లు తెలిసింది."

- ఛత్తీస్​గఢ్​ పోలీసులు

ఇదీ చూడండి:ఇంట్లో మూడు అస్థిపంజరాలు- ఎవరివి?