గుజరాత్ పర్యటనకు వెళ్లిన దిల్లీ ముఖ్యమంత్రి అరవింద్ కేజ్రీవాల్ చేదు అనుభవం ఎదురైంది. ఆయనపై గుర్తు తెలియని ఓ వ్యక్తి వాటర్ బాటిల్ను విసిరాడు. అయితే ఆ బాటిల్ కేజ్రీవాల్ తలపై నుంచి వెళ్లి పక్కన పడింది. ప్రస్తుతం ఈ వీడియో సామాజిక మాధ్యమాల్లో వైరల్గా మారింది. ఆప్ అధినేత రాజ్కోట్లో గర్బా కార్యక్రమంలో పాల్గొనగా.. ఈ ఘటన జరిగింది.
గోవు సంరక్షణకు రూ.40..
ఆమ్‌ ఆద్మీ పార్టీ అధికారంలోకి వస్తే గోసంరక్షణ కోసం నిధులు కేటాయిస్తామని కేజ్రీవాల్ హామీ ఇచ్చారు. ప్రతి గోవుకు రోజుకు రూ.40 ఇస్తామని కేజ్రీవాల్ పేర్కొన్నారు. ఆప్ ఓట్లను చీల్చడానికి అధికార భాజపా, కాంగ్రెస్ కుమ్మక్కయ్యాయని విమర్శించారు. గుజరాత్లో రాబోయే ఎన్నికల్లో విజయం సాధించి ప్రభుత్వాన్ని ఏర్పాటు చేస్తామని ధీమా వ్యక్తం చేశారు. ఇప్పటికిప్పుడు ఎన్నికలు జరిగినా ఆప్ విజయం సాధిస్తుందని తెలిపారు. భాజపా వ్యతిరేక ఓట్లను చీల్చే బాధ్యత కాంగ్రెస్ తీసుకుందని విమర్శించారు. ఈసారి ఎన్నికల్లో కాంగ్రెస్ 10 సీట్లకు మించి గెలవదని జోస్యం చెప్పారు.