'జమ్ముకశ్మీర్​లో రాజకీయ హత్యలకు కుట్ర'

జమ్ముకశ్మీర్​లోని దోడా జిల్లాలో రాజకీయ హత్యలకు.. ఓ తీవ్రవాది కుట్రపన్నినట్లు సైనిక అధికారులు తెలిపారు. ఆ ఉగ్రవాదిని గత శుక్రవారం అరెస్టు చేయగా.. తాజాగా ఈ వివరాలను వెల్లడించారు.

జమ్ముకశ్మీర్​లో ఇటీవలే సైన్యం అరెస్టు చేసిన ఓ ఉగ్రవాది.. సంచలన రాజకీయ హత్యలకు కుట్రపన్నాడు. ఈ విషయాన్ని భారత సైన్యం ఆదివారం వెల్లడించింది. ఆ ఉగ్రవాదితో పాటు భారీగా ఆయుధాలు, మందుగుండు సామాగ్రిని కూడా స్వాధీనం చేసుకున్నట్టు పేర్కొన్నారు.

శుక్రవారం.. ఆర్మీ, పోలీసులు, పారా మిలటరీ దళాలు నిర్వహించిన జాయింట్​ ఆపరేషన్​లో.. ఫిర్దోస్​ అహ్మద్ నట్నూను దోడాలోని బెఖ్రియన్​ గ్రామంలో అరెస్టు చేశారు. అతడి నుంచి మూడు చైనా పిస్టోల్స్‌తో పాటు ఐదు మ్యాగజైన్స్​, 15 రౌండ్ల తూటాలు, ఓ సైలెన్సర్​ను స్వాధీనం చేసుకున్నారు.

"ఫిర్దోస్​ అహ్మద్ నట్నూ అనే ఉగ్రవాది రాజకీయ హత్యలకు కుట్ర పన్నాడనే సమాచారం మాకు అందింది. ఫిర్దోస్​, అతడి అనుచరులపై భద్రతా బలగాలు రెండు నెలలుగా నిఘా ఉంచాయి. ఆర్మీ, పోలీసులు, పారా మిలటరీ బలగాల సంయుక్త ఆపరేషన్​లో అతడిని పట్టుకున్నాం."

-లెఫ్టినెంట్ కల్నల్ దేవేందర్ ఆనంద్, ఆర్మీ అధికారి

జిల్లాలో ఉగ్రవాద చర్యలకు సంబంధించిన పలు కార్యక్రమాల్లో నట్నూ హస్తం ఉందని అధికారులు తెలిపారు. అంతేకాకుండా ఉగ్రవాదుల నియామకం, ఆయుధాలు, మందుగుండు సామగ్రి, నిధుల సమీకరణల్లో చురుగ్గా పాల్గొనేవాడని పేర్కొన్నారు. గతంలో నిర్వహించిన నిర్భంద తనిఖీల్లో నాట్నూ తప్పించున్నట్లు వివరించారు.

ఇదీ చూడండి:100 మంది మహిళల్ని వేధించిన వ్యక్తి అరెస్ట్