AP CID Interrogated Sailaja Kiran: మార్గదర్శి సంస్థను అప్రతిష్ఠపాలు చేయాలన్న దుర్బుద్ధితో.. చిట్‌ఫండ్‌పై తప్పుడు ఆరోపణలతో కేసులు పెట్టి వేధిస్తున్న ఆంధ్రప్రదేశ్‌ సీఐడీ.. మరోమారు విచారణ పేరుతో హడావుడి చేసింది. సంస్థ ఎండీ శైలజాకిరణ్‌ను మంగళవారం సుమారు 7 గంటలపాటు విచారించింది. వేధింపులే లక్ష్యంగా సీఐడీ అధికారుల తీరు ఉన్నట్లు కనిపించింది. అడిగిన ప్రశ్నలే మళ్లీ మళ్లీ అడగడం.. పొంతన లేని అంశాల గురించి ప్రస్తావించడం వారి దురుద్దేశాన్ని వెల్లడించింది. తొలుత విచారణ నిమిత్తం 40 ప్రశ్నలు అడుగుతామని చెప్పినా.. అధికారులు రోజంతా కేవలం 8 ప్రశ్నలనే తిప్పి తిప్పి అడిగారు. పలుమార్లు అవే ప్రశ్నలతో తికమక పెట్టే ప్రయత్నం చేసినా... శైలజాకిరణ్‌ నింపాదిగా సమాధానాలు చెప్పారు.
Margadarsi మార్గదర్శిలో ఆడిటింగ్‌పై తెలంగాణ హైకోర్టు స్టే..
మార్గదర్శి విశ్వసనీయతను దెబ్బతీసేందుకు శతవిధాలా ప్రయత్నిస్తున్న ఆంధ్రప్రదేశ్‌ ప్రభుత్వం... ఈ క్రమంలో చిట్‌ఫండ్‌కు చెందిన 793.5 కోట్ల విలువైన సొమ్మును ఎటాచ్‌ చేసేందుకు ఇటీవలే జీవో జారీ చేసింది. చందాదారుల్లో సంస్థపై నమ్మకం ఇసుమంత కూడా సడలకపోవడంతో... మరోసారి విచారణ పేరుతో పన్నాగానికి తెరలేపింది. చిట్‌ఫండ్‌ సంస్థపై నమోదు చేసిన కేసు దర్యాప్తు పేరిట ఇప్పటికే సంస్థ ఎండీ శైలజాకిరణ్‌ను ఒకసారి విచారించిన సీఐడీ... హైదరాబాద్‌ జూబ్లీహిల్స్‌లోని ఆమె నివాసంలో మంగళవారం మరోసారి విచారణ జరిపింది.
ఏపీ సీఐడీ ఎస్పీలు అమిత్‌ బర్దార్, హర్షవర్ధన్‌రాజు, అదనపు ఎస్పీ రవివర్మ, దర్యాప్తు అధికారి రవికుమార్‌ నేతృత్వంలో... 20 మంది సభ్యుల బృందం మంగళవారం ఉదయం పదిన్నర గంటల సమయంలో ఆమె నివాసానికి చేరుకుంది. సీఐడీ అధికారులు తమ వెంట డైరెక్టరేట్‌ ఆఫ్‌ రెవెన్యూ ఇంటెలిజెన్స్‌ - డీఆర్ఐ అధికారులనూ తీసుకొచ్చారు. లోపలికి రాగానే ఈ విషయాన్ని గుర్తించిన మార్గదర్శి సిబ్బంది... దీనిపై అభ్యంతరం తెలిపారు. ఈ కేసుతో డీఆర్ఐ అధికారులకు ఏం సంబంధం ఉందని నిలదీశారు. తమ దర్యాప్తునలో సహకారం కోసమే డీఆర్ఐ అధికారులను తీసుకొచ్చామని సీఐడీ అధికారులు వెల్లడించారు. తర్జనభర్జన తర్వాత సీఐడీ అధికారుల అభ్యర్థనను మార్గదర్శి సిబ్బంది అంగీకరించారు. సాయంత్రం దాదాపు 5 గంటల 45 నిమిషాల వరకూ విచారణ కొనసాగింది.
సీఐడీ అడిగిన అన్ని ప్రశ్నలకూ శైలజాకిరణ్‌ స్పష్టమైన సమాధానాలిచ్చారు. అనంతరం ఆమె వాంగ్మూలాన్ని దాదాపు 3 గంటలపాటు సీఐడీ నమోదు చేసింది. 8 గంటల 45 నిమిషాల సమయంలో సీఐడీ బృందం వెనుదిరిగింది. విచారణ తర్వాత శైలజాకిరణ్‌ నివాసం బయట సీఐడీ దర్యాప్తు అధికారి రవికుమార్‌ మీడియాతో మాట్లాడారు. విచారణకు మార్గదర్శి ఎండీ పూర్తిస్థాయిలో సహకరించారని తెలిపారు.