మాజీ హోం మంత్రిపై ఈడీ ఛార్జిషీట్​.. భార్య, కుమారులపైనా..

Anil Deshmukh ED Chargesheet: మనీలాండరింగ్ కేసులో మహారాష్ట్ర మాజీ హోం మంత్రి అనిల్ దేశ్​ముఖ్​పై అనుబంధ ఛార్జిషీట్ దాఖలు చేసింది ఈడీ. అనిల్​ దేశ్​ముఖ్​ భార్య, కుమారుల పేర్లనూ ప్రత్యేక కోర్టుకు సమర్పించిన ఛార్జిషీట్​లో పేర్కొంది. జనవరి 10 వరకు అనిల్ దేశ్​ముఖ్​కు జ్యుడిషియల్ కస్టడీని పొడిగించింది.

Anil Deshmukh ED Chargesheet: మనీలాండరింగ్​ కేసులో అరెస్టయిన మహారాష్ట్ర మాజీ హోంమంత్రి అనిల్ దేశ్​ముఖ్​పై ఎన్​ఫోర్స్​మెంట్​ డైరెక్టరేట్​(ఈడీ) అనుబంధ ఛార్జిషీట్ దాఖలు చేసింది. దాదాపు 7వేల పేజీలు ఉన్న ఈ అభియోగ పత్రంలో దేశ్​ముఖ్​ భార్య, కుమారులను కూడా నిందితులుగా పేర్కొంది. ఈ ఛార్జిషీట్​ను ప్రత్యేక కోర్టుకు సమర్పించింది ఈడీ.

55 రోజులుగా జ్యుడీషియల్ కస్టడీలో ఉన్న అనిల్​కు ప్రస్తుతం గడువు పూర్తయినందువల్ల ప్రత్యేక కోర్టులో హాజరుపరిచింది ఈడీ. జ్యుడిషియల్ కస్టడీని ప్రత్యేక కోర్టు జనవరి 10వరకు పొడిగించింది.

Anil Deshmukh News: అనిల్ దేశ్​ముఖ్​ను ఎన్​ఫోర్స్​మెంట్​ డైరెక్టరేట్(ఈడీ) నవంబరు 2వ తేదీ అర్ధరాత్రి అరెస్టు చేసింది. మనీలాండరింగ్ కేసులో 12 గంటలపాటు ప్రశ్నించిన అధికారులు.. అనంతరం ఆయన్ను అదుపులోకి తీసుకున్నారు. ఈ కేసులో అనిల్ దేశ్​ముఖ్​తో పాటు కుందన్​ శిందే, సంజీవ్ పలాండేను సైతం ఈడీ అధికారులు అరెస్ట్ చేశారు.

బార్లు, రెస్టారెంట్ల నుంచి ప్రతి నెల రూ.100కోట్లు వసూలు చేయాలని పోలీసు అధికారులపై దేశ్‌ముఖ్‌ ఒత్తిడి తెచ్చినట్లు ముంబయి మాజీ సీపీ పరంబీర్‌ సింగ్‌ ఆరోపించారు. ఈ ఆరోపణలపై విచారణ జరిపిన కేంద్ర దర్యాప్తు సంస్థ(సీబీఐ) ఆయనపై కేసు నమోదు చేసింది. సీబీఐ ఎఫ్​ఐఆర్​ ఆధారంగా ఈడీ ఆయనపై చర్యలు చేపట్టింది.

ఇవీ చూడండి:అప్పటివరకు ఈడీ కస్టడీలోనే మాజీ హోంమంత్రి