''ఎస్సీ' అంటూ పోలీసులు తిట్టారు.. నీళ్లివ్వలేదు, బాత్​రూమ్​కు వెళ్లనివ్వలేదు'

MP Navneet Rana: మహారాష్ట్ర హనుమాన్​ చాలీసా వివాదంలో అరెస్ట్​ అయిన అమరావతి ఎంపీ నవనీత్​ కౌర్​ రాణా పోలీసులపై సంచలన ఆరోపణలు చేశారు. ఎస్సీ అనే కారణంగా అసభ్య పదజాలంతో మాట్లాడారని, కనీస్​ బాత్​రూమ్​ వినియోగించుకునేందుకు ఒప్పుకోలేదని ఆవేదన వ్యక్తం చేస్తూ లోక్​సభ స్పీకర్​ ఓం బిర్లాకు లేఖ రాశారు.

MP Navneet Rana: హనుమాన్​ చాలీసా వివాదంలో అరెస్టయి, జుడీషియల్​ కస్టడీలో ఉన్న మహారాష్ట్ర అమరావతి ఎంపీ, టాలీవుడ్​ మాజీ నటి నవనీత్​ కౌర్​ రాణా సంచలన వ్యాఖ్యలు చేశారు. రాత్రి సమయంలో బాత్​రూమ్​కు​ వెళ్లాలన్నా.. తన మాటను పోలీసులు వినలేదని ఆరోపించారు. అసభ్య పదజాలంతో ఘోరంగా అవమానించారని ఆవేదన వ్యక్తం చేశారు. "తక్కువ జాతి వారు మా బాత్​రూమ్​లు వినియోగించుకునేందుకు ఒప్పుకోం" అంటూ మాట్లాడారని ఆరోపించారు నవనీత్​. కనీసం మంచి నీళ్లు కూడా ఇవ్వలేదని దుయ్యబట్టారు. ఈ మేరకు తన అరెస్ట్​పై లోక్​సభ స్పీకర్​ ఓం బిర్లాకు లేఖ రాశారు.

" ఎన్నికల్లో ప్రజల తీర్పును మార్చి కాంగ్రెస్​-ఎన్​సీపీతో కూటమి ఏర్పాటు చేసేందుకే ఉద్ధవ్​ ఠాక్రే నేతృత్వంలోని శివసేన తాను కట్టుబడిన హిందుత్వ నియమాలను పూర్తిగా పక్కనపెట్టేసింది. శివసేనలో హిందుత్వాన్ని నిద్రలేపేందుకే ముఖ్యమంత్రి ఇంటి ముందు హనుమాన్​ చాలీసా చదువుతామని ప్రకటించాం. మతపరమైన ఉద్రిక్తతలను సృష్టించటం దాని ఉద్దేశం కాదు. హనుమాన్​ చాలీసా చదివేందుకు మాతో పాటు చేయి కలపాలని ముఖ్యమంత్రిని ఆహ్వానించాను. సీఎంకు వ్యతిరేకంగా ఎలాంటి చర్యలు చేపట్టలేదు. అయితే, మా ప్రకటన శాంతిభద్రతలకు విఘాతం కలిగించే అవకాశం ఉందన్న కారణంగా మా ప్రయత్నాలను మానుకుంటున్నట్లు బహిరంగంగా ప్రకటించాం. సీఎం ఇంటికి వెళ్లటం లేదని స్పష్టం చేశాం. నేను, నా భర్త రవి రాణా ఇంట్లోనే ఉండిపోయాం."

- నవనీత్​ కౌర్​ రాణా, అమరావతి ఎంపీ

ఏప్రిల్​ 23న తనను ఖార్​ పోలీస్​ స్టేషన్​కు తీసుకెళ్లారని, ఆ రోజు రాత్రి అక్కడే ఉంచారని లేఖలో పేర్కొన్నారు నవనీత్​ రాణా. రాత్రి పలుమార్లు మంచి నీళ్లు కావాలని కోరినా ఇవ్వలేదని ఆవేదన వ్యక్తం చేశారు. పోలీసులు మాట్లాడిన మాటలకు ఆశ్చర్యానికి గురయ్యానన్నారు. తాను ఎస్సీ కాబట్టే వారు తాగే గ్లాస్​లో మంచి నీళ్లు ఇవ్వమని చెప్పారని, కులం పేరుతో దూషించారని ఆరోపించారు.

క్షీణించిన నవనీత్​ రాణా ఆరోగ్యం: జుడీషియల్​ కస్టడీలో భాగంగా బైకుల్లా జైలులో ఉన్న అమరావతి ఎంపీ నవనీత్ కౌర్​ ఆరోగ్యం క్షీణించింది. చికిత్స నిమిత్తం ఆమెను ఆదివారం ఉదయం బైకుల్లా జైలు ఆసుపత్రికి తరలించారు. ఈ క్రమంలో రాణా జీవితం ప్రమాదంలో ఉందని ఆమె న్యాయవాది పేర్కొన్నారు. మెరుగైన వైద్యం నిమిత్తం నవనీత్​ రాణాను మరో ఆసుపత్రికి తరలించే అవకాశం ఉన్నట్లు అధికార వర్గాలు తెలిపాయి.

హైకోర్టులో చుక్కెదురు: హనుమాన్‌ చాలీసా పారాయణ వివాదంలో అరెస్టయిన ఎంపీ నవనీత్‌ రాణా దంపతులకు మరో షాక్‌ తగిలింది. ఈ వివాదంలో తమపై నమోదైన ఎఫ్‌ఐఆర్‌ను కొట్టివేయాలంటూ రాణా దంపతులు దాఖలు చేసిన రిట్ పిటిషన్‌ను బాంబే హైకోర్టు తోసిపుచ్చింది. సోమవారం విచారణ జరిపి ఉన్నత న్యాయస్థానం.. ఈ పిటిషన్‌కు ఎలాంటి అర్హత లేదంటూ కొట్టివేసింది. అయితే.. రాణా దంపతులపై చర్యలు చేపట్టాలనుకుంటే వారికి 72 గంటల ముందు నోటీసులివ్వాలని మహారాష్ట్ర ప్రభుత్వాన్ని ఆదేశించింది.

ఇదీ చూడండి:ఎంపీ నవనీత్​ కౌర్​ దంపతులకు షాక్.. 14 రోజులు జైలులోనే!