కొవిడ్పై పోరులో ముందుండి పోరాడుతున్న వారికే మొదటి దశలో టీకా అందిస్తామని పంజాబ్ ప్రభుత్వం ప్రకటించింది. టీకాను ఐసీఎంఆర్ ఆమోదించిన వెంటనే ఆ రాష్ట్ర ముఖ్యమంత్రి అమరీందర్ సింగ్ తీసుకోనున్నారు. ఆ తర్వాత రాష్ట్రంలోని 1.25 లక్షల మంది ఆరోగ్య కార్యకర్తలకు టీకా అందించనున్నారు. పంజాబ్లో కరోనా వ్యాప్తి, వ్యాక్సిన్ పంపిణీ సన్నద్ధత అంశాలపై వర్చువల్గా జరిగిన కేబినెట్ భేటీలో అమరీందర్ సింగ్ పాల్గొన్నారు. అనంతరం ఈ నిర్ణయం తీసుకున్నారు.
ఆరోగ్య కార్యకర్తలు, ఫ్రంట్లైన్ వర్కర్స్, వృద్ధులు, దీర్ఘకాలిక వ్యాధులతో బాధపడే మరో 70 లక్షల (రాష్ట్ర జనాభాలో 23 శాతం)మందికి మొదట టీకా అందించాలని పంజాబ్ ప్రభుత్వం నిర్ణయించింది. వ్యాక్సిన్ పంపిణీపై కేంద్ర వ్యూహానికి తగ్గట్టుగా పంజాబ్ ఈ విధానాన్ని అమలు చేయనుంది. టీకా పంపిణీలో అవాంతరాలు లేకుండా ఉండటానికి, జాతీయ స్టీరింగ్ కమిటీతో ఆ రాష్ట్ర స్టీరింగ్ కమిటీ సమన్వయంతో వ్యవహరిస్తోంది. అదే విధంగా బ్లాక్ లెవల్, జిల్లా టాస్క్ ఫోర్స్ కమిటీలతో కలిసి రాష్ట్ర టాస్క్ ఫోర్స్ పనిచేయనుంది.