కరోనా కట్టడికి మరిన్ని నగరాల్లో ఆంక్షలు

కొవిడ్​ వ్యాప్తి నేపథ్యంలో.. అహ్మదాబాద్​లోని అన్ని పార్కులు, గార్డెన్లు మూసేయనున్నట్లు తెలిపింది అధికార యంత్రాంగం. తదుపరి ఆదేశాలు వచ్చే వరకు ఈ నిబంధన అమల్లో ఉంటుందని పేర్కొంది. మధ్యప్రదేశ్​లోని రెండు నగరాల్లో బుధవారం రాత్రి పూట కర్ఫ్యూ విధించనున్నట్లు ముఖ్యమంత్రి శివరాజ్ సింగ్ చౌహాన్ ప్రకటించారు.

గుజరాత్​లో కరోనా ఉద్ధృతి పెరుగుతోన్న నేపథ్యంలో అహ్మదాబాద్​లోని పార్కులు, గార్డెన్లను పూర్తిస్థాయిలో మూసేయాలని అధికార యంత్రాంగం నిర్ణయించింది. గురువారం నుంచి ఈ నిబంధన అమలువుతుందని స్పష్టం చేసింది. కంకారియా సరస్సు, జంతుప్రదర్శనశాలనూ మూసివేయనున్నట్లు పేర్కొంది.

ఇటీవలే నాలుగు మెట్రో నగరాల్లో రాత్రి పూట పూర్తిస్థాయిలో కర్ఫ్యూ విధించాలని గుజరాత్​ ప్రభుత్వం నిర్ణయించింది. మార్చి 17 నుంచి మార్చి 31 వరకు ఈ నిబంధన అమల్లో ఉంటుందని స్పష్టం చేసింది.

అహ్మదాబాద్, సూరత్, వడోదర, రాజ్​కోట్​లో అధికంగా కేసులు వెలుగుచూస్తున్నాయి.

ఒక్కరోజు కర్ఫ్యూ...

మధ్యప్రదేశ్​లోని ఇందోర్​, భోపాల్​ నగరాల్లో వైరస్​ వ్యాప్తి పెరుగుతోన్న నేపథ్యంలో ఒక్కరోజు రాత్రి(బుధవారం రాత్రి 10 గంటల నుంచి గురువారం ఉదయం వరకు) కర్ఫ్యూ విధిస్తున్నట్లు ముఖ్యమంత్రి శివరాజ్ సింగ్ చౌహాన్ తెలిపారు.

రాష్ట్రంలో కరోనా పాజిటివిటీ రేటు 4.3 శాతానికి పెరిగిందని వెల్లడించారు. 54 శాతం పాజిటివ్​ కేసులు ఇందోర్​, భోపాల్​ నగరాల్లోనే ఉన్నాయని పేర్కొన్నారు. బజల్​పుర్​లోనూ వైరస్​ ఉద్ధృతి పెరుగుతోందని చెప్పారు శివరాజ్​.

ఇదీ చదవండి:బంగాల్​ బొగ్గు స్కాంలో మరొకరు అరెస్ట్​