విమర్శలకు చెక్​.. రెండు ఇళ్లు అద్దెకు తీసుకున్న దీదీ!

నందిగ్రామ్​లో భాజపా విమర్శలకు చెక్​ పెట్టే ప్రయత్నం చేస్తున్నారు బంగాల్​ ముఖ్యమంత్రి మమతా బెనర్జీ. తాను పోటీ చేస్తున్న ఆ నియోజకవర్గంలోని రెయ్​పారా ప్రాంతంలో రెండు ఇళ్లను అద్దెకు తీసుకున్నారు. దీదీ బయటి వ్యక్తి అని సువేందు అధికారి సహా భాజపా ఆరోపిస్తున్న నేపథ్యంలో ఆమె ఈ నిర్ణయం తీసుకున్నట్లు తెలుస్తోంది.

బంగాల్ ముఖ్యమంత్రి మమతా బెనర్జీ తాను పోటీ చేస్తున్న నందిగ్రామ్​లో రెండు ఇళ్లు అద్దెకు తీసుకున్నారు. నందిగ్రామ్​లోని రెయ్​పారా ప్రాంతంలో ఈ గృహాలు ఉన్నాయి. త్వరలోనే తాను నందిగ్రామ్​లో శాశ్వత నివాసం కూడా ఏర్పాటు చేసుకుంటానని ఆదివారం ఎన్నికల ర్యాలీలో ఆమె ప్రకటించారు.

మమత ఏడాది కోసం ఓ ఇంటిని, ఆర్నెళ్ల కోసం మరో ఇంటిని అద్దెకు తీసుకున్నట్లు స్థానికులు తెలిపారు. ఈ రెండు ఇళ్లకు మధ్య దూరం కేవలం 100 మీటర్లే.

ఇదీ చూడండి: మమత స్థానచలనం వెనక మతలబేంటి?

మమత బయటి నుంచి వచ్చిన వ్యక్తి అంటూ ప్రత్యర్థి, భాజపా అభ్యర్థి సువేందు అధికారి పదే పదే ఆరోపణలు చేస్తుండగా ఆమె ఈ నిర్ణయం తీసుకోవడం గమనార్హం. మమత నందిగ్రామ్​కు చెందిన వ్యక్తి కాదంటూ నామినేషన్ వేసిన వెంటనే సువేందు ఆరోపించారు.

ఇదీ చూడండి:'భాజపా ఉచిత రేషన్​ హామీ.. ఓ పెద్ద అబద్ధం'