విస్తరిస్తున్న బర్డ్​ ఫ్లూ- మధ్యప్రదేశ్​కు వ్యాప్తి

రాజస్థాన్​లో పక్షుల మరణానికి కారణమవుతున్న బర్డ్​ ఫ్లూ మధ్యప్రదేశ్​కు విస్తరించింది. ఇందోర్​​లో మూడురోజుల క్రితం మరణించిన కాకులకు ఈ వైరస్ సోకింది. అటు.. మధ్యప్రదేశ్​ ఝాలావాడ్​లో వెలుగులోకి వచ్చిన వైరస్.. ఆ జిల్లాలోని ఇతర ప్రాంతాలకు వ్యాపించింది.

రాజస్థాన్​లో వెలుగులోకి వచ్చిన బర్డ్​ ఫ్లూ కేసులు మధ్యప్రదేశ్​లోనూ నమోదయ్యాయి. ఇందోర్​లో మూడు రోజుల క్రితం చనిపోయిన కాకులకు ఈ వైరస్ ఉన్నట్లు తేలింది. గత నాలుగు రోజుల్లో ఈ ప్రాంతంలో 96 కాకులు మరణించాయి. దీంతో అప్రమత్తమైన అధికారులు.. ముందుజాగ్రత్త చర్యలు చేపట్టారు. ఐదు కిలోమీటర్ల పరిధిలో ఎవరూ తిరగకుండా.. కర్ఫ్యూ విధించారు. ఫ్లూ సోకినట్లు అనుమానం ఉన్న పక్షులను గుర్తించే పనిలో పడ్డారు.

"దాదాపు యాభై కాకులు డేలీ కాలేజీ వద్ద పడిపోయి ఉన్నాయి. అందులో కొన్ని మృతదేహాల నమూనాలను భోపాల్​కు పంపించాం. రెండింటిలో హెచ్​5ఎన్8 వైరస్, మిగిలినవాటిలో ఏవియన్ ఇన్​ఫ్ల్యుయెంజా(బర్డ్ ఫ్లూ) ఉన్నట్లు గుర్తించాం."

-పూర్ణిమా గదారియా, ఇందోర్ ముఖ్య వైద్యాధికారి

శుక్రవారం సైతం మరో 20 కాకులు చనిపోయాయని పూర్ణిమ తెలిపారు. వాటి నమూనాల ఫలితం రావాల్సి ఉందన్నారు.

వ్యాపిస్తున్న వైరస్

మరోవైపు, మధ్యప్రదేశ్​లోని ఝాలావాడ్​లో గుర్తించిన ఏవియన్ ఇన్​ఫ్లుయెంజా.. ఆ జిల్లాలోని ఇతర ప్రాంతాలకు విస్తరిస్తోంది. పన్వార్, సునేల్ ప్రాంతాల్లోనూ కాకుల మరణాలు సంభవించాయి. శనివారం ఝాలావాడ్​లో 16 కాకులు మరణించగా.. పన్వార్​లో 10, సునేల్​లో 8 కాకులు మృతి చెందాయి. పన్వార్​లో నాలుగు రోజుల క్రితం 60 కాకులు కూడా చనిపోయినట్లు స్థానికులు చెబుతున్నారు. అధికారులు స్పందించి.. నమూనాలను పరీక్షలకు తరలిస్తున్నారు.