తను ప్రేమించిన అమ్మాయికి మరో వ్యక్తితో పెళ్లి నిశ్చయమవటాన్ని తట్టుకోలేని ఓ యువకుడు కిరాతక చర్యకు పాల్పడ్డాడు. ఇంటి ముందు నిద్రిస్తున్న బాలికపై యాసిడ్ దాడి(acid attack) చేశాడు. ఈ ఘటనలో బాలికతో పాటు ఆమె చిన్న తమ్ముడికి తీవ్ర గాయాలయ్యాయి. ఈ సంఘటన ఉత్తర్ప్రదేశ్ రాయ్బరేలీలో జరిగింది.
ఇదీ జరిగింది...
జిల్లాలోని సికందర్పుర్ గ్రామానికి చెందిన ఓ బాలిక(16), తన చిన్న తమ్ముడితో కలిసి ఆదివారం రాత్రి ఇంటి ముందు మంచంపై నిద్రిస్తోంది. అర్ధరాత్రి వారిపై యాసిడ్ దాడి జరిగింది. తీవ్ర గాయాలతో అరవగా.. కుటుంబ సభ్యులు లేచి వారిని జిల్లా ఆసుపత్రికి తరలించారు. అక్కడి నుంచి మెరుగైన చికిత్స కోసం లఖ్నవూకు తీసుకెళ్లారు. ప్రస్తుతం వారి పరిస్థితి విషమంగా ఉన్నట్లు తెలిసింది. ఈ సంఘటనతో గ్రామంలో ఉద్రిక్త పరిస్థితులు నెలకొన్నాయి.
సమాచారం అందుకున్న పోలీసులు గ్రామానికి చేరుకుని దర్యాప్తు చేపట్టారు. ఆదివారం రాత్రి కొందరు దుండగులు ఇంట్లోకి చొరబడి వస్తువులను దొంగతనం చేశారని, తిరిగి వెళ్తున్న క్రమంలో వాళ్లపై యాసిడ్ దాడి చేసి పారిపోయారని పోలీసులకు ఫిర్యాదు చేశారు బాధితురాలి కుటుంబ సభ్యులు. ప్రాథమిక విచారణలో అదే గ్రామానికి చెందిన బబ్లూ లోధ్ అనే యువకుడు ఈ దాడికి పాల్పడినట్లు తెలుసుకుని.. నిందితుడిని అరెస్ట్ చేశారు.
'నిందితుడు, బాధితురాలి మధ్య పరిచయం ఉంది, కొద్ది రోజుల్లో బాలిక వివాహం ఉందని తెలుసుకున్న బబ్లూ కోపం పెంచుకున్నాడు. బాధితురాలి తండ్రిని చంపుతానని బెదిరించినట్లు తెలిసింది. ప్రస్తుతానికి నిందితుడిని అరెస్ట్ చేశాం. దర్యాప్తు కొనసాగుతోంది' అని జిల్లా ఎస్పీ శ్లోక కుమార్ తెలిపారు.
ఇదీ చూడండి:బాలికపై యాసిడ్ దాడి.. పరిస్థితి విషమం!
