బైడెన్​పై ప్రేమతో మైనపు విగ్రహం

ప్రముఖులపై అభిమానాన్ని చాటుకునేందుకు చాలా మంది రకరకాల ప్రయత్నాలు చేస్తుంటారు. అందులో భాగంగానే.. అమెరికా అధ్యక్షుడిగా ఇటీవల ప్రమాణస్వీకారం చేసిన జో బైడెన్​ విగ్రహాన్ని రూపొందించి.. తన అభిమానాన్ని చాటుకున్నారో కళాకారుడు. ఎలాంటి కొలతలు లేకుండా చెక్కిన ఆ శిల్పం.. అచ్చం బైడెన్​ను తలపించడం విశేషం.

పంజాబ్​కు చెందిన ఓ వ్యక్తి.. అమెరికా నూతన అధ్యక్షుడు జో బైడెన్​పై అభిమానాన్ని తన కళ ద్వారా చాటుకున్నారు. అగ్రరాజ్య 46వ అధ్యక్షుడిగా ప్రమాణస్వీకారం చేసిన జో విగ్రహాన్ని అందంగా తీర్చిదిద్దారు పంజాబ్​ కళాకారుడు చంద్రశేఖర్​ ప్రభాకర్​. ఎలాంటి కొలతలు లేకుండా చెక్కిన ఆ సిలికాన్​ విగ్రహాన్ని చూస్తే.. అచ్చం బైడెనే తమ జాతీయ జెండా చేతబూని సెల్యూట్​ చేస్తున్నట్టుగా కనిపిస్తుంది.

జో​ విగ్రహానికి తుదిమెరుగులు దిద్దుతూ..

లుథియానాకు చెందిన చంద్రశేఖర్​ ప్రభాకర్​ వృత్తిరీత్యా శిల్పి. 15 ఏళ్లుగా మైనపు విగ్రహాలను తయారు చేస్తూ జీవనం సాగిస్తున్నారు. ఏడు పదుల వయసులోనూ అద్భుత నైపుణ్యంతో.. ప్రముఖుల ప్రతిరూపాలను ఎంతో ఆకర్షణీయంగా తీర్చిదిద్దుతున్నారు ప్రభాకర్​. అందులో భాగంగానే.. అమెరికాకు ఇటీవలే అధ్యక్షుడిగా ఎన్నికైన బైడెన్​ విగ్రహాన్ని.. మైనం, సిలికాన్​లతో తయారు చేశారు.

నాలుగు నెలల్లోనే..

కరోనా వ్యాప్తి నేపథ్యంలో తన మ్యూజియం మూతపడినందున కొద్ది కాలంగా ఇంట్లోనే ఉంటున్నారు ప్రభాకర్​. అప్పుడే బైడెన్​ విగ్రహాన్ని రూపొందించాలనే ఆలోచన వచ్చిందట. అనుకున్నది తడువే నాలుగు నెలల్లోనే తన అభిమానాన్ని విగ్రహరూపంలో ప్రదర్శించారీ కళాకారుడు.

బైడెన్ ప్రతిరూపంతో ప్రభాకర్​

ఇదీ చదవండి:నొయిడాలో బాంబు కలకలం.. చివరకు ఏమైందంటే?