Honda Activa VIP number: ఫ్యాన్సీ నంబర్ కోసం కొంతమంది ఎంత ఖర్చు చేసేందుకైనా వెనుకాడరు. ఖరీదైన కారు యజమానులు ఒక్కోసారి రూ.లక్షలు వెచ్చించి తమకు ఇష్టమైన రిజిస్ట్రేషన్ నంబర్ దక్కించుకుంటారు. అయితే హరియాణా చండీగఢ్కు చెందిన ఓ వ్యక్తి మాత్రం రూ.71వేలు ఖరీదు చేసే స్కూటీకి.. ఫ్యాన్సీ నంబర్ ప్లేట్ కోసం ఏకంగా రూ.15.44 లక్షలు ఖర్చు చేశాడు. వేలంపాటలో తీవ్రంగా పోటీ ఉన్నా.. తగ్గేదే లే.. అన్నట్లుగా అనుకున్న నంబర్ సాధించాడు.
Haryana fancy number plate: ఫ్యాన్సీ నంబర్ దక్కించుకున్న ఈ 42 ఏళ్ల వ్యక్తి పేరు బ్రజ్మోహన్. చండీగఢ్లోని సెక్టార్-23లో నివాసముంటున్నారు. అడ్వర్టైజింగ్ వ్యాపారం నిర్వహిస్తారు. ఇటీవలే హోండా యాక్టివా కొనుగోలు చేశారు. దానికి ఫ్యాన్సీ నంబర్ ప్లేట్ కోసం చండీగఢ్ రిజిస్ట్రేషన్ అండ్ లెసైన్సింగ్ అథారిటీ నిర్వహించిన వేలంపాటలో పాల్గొన్నారు. చివరకు రూ.15.44లక్షలతో 'CH01-CJ-0001' వీఐపీ నంబర్ను దక్కించుకున్నారు. ఈ అరుదైన సంఖ్య కోసం ఇతరులు కూడా తీవ్రంగా పోటీపడ్డారు. కానీ బ్రజ్మోహన్ అంతిమ విజేతగా నిలిచారు. ఈ వేలంపాటను ఏప్రిల్ 14-16 మధ్య నిర్వహించారు. మొత్తం 378 ఫ్యాన్సీ నంబర్లను వేలం వేయగా.. రూ.1.5కోట్ల ఆదాయం వచ్చిందని అధికారులు తెలిపారు.