15ఏళ్ల బాలికపై సామూహిక అత్యాచారం

యూపీలో 15 ఏళ్ల బాలికపై కొందరు దుండగులు సామూహిక అత్యాచారం చేసినట్టు పోలీసులు తెలిపారు. రెండు కుటుంబాల మధ్య పాత గొడవలే ఇందుకు కారణమని భావిస్తున్నట్లు చెప్పారు.

యూపీలో మరో అత్యాచార ఘటన బయటపడింది. 15ఏళ్ల బాలికపై సామూహిక అత్యాచారం చేసి, అనంతరం ఆమెను కత్తితో పొడిచినట్టు పోలీసులు తెలిపారు.

ఇదీ జరిగింది..

గోండా జిల్లాలోని ఓ గ్రామీణ ప్రాంతానికి చెందిన 15ఏళ్ల బాలిక.. మంగళవారం సాయంత్రం పాఠశాల నుంచి సైకిల్​పై ఇంటికి వెళ్తున్న సమయంలో నలుగురు దుండగులు ఎత్తుకెళ్లారు. అనంతరం ఆమెను సమీపంలోని పొలంలోకి లాక్కెళ్లి అత్యాచారం చేసినట్టు పోలీసులు తెలిపారు. ఆ బాలిక ప్రతిఘటించగా కత్తితో పొడిచి గాయపరిచినట్టు స్థానిక ఎస్పీ శైలేశ్ కుమార్​ చెప్పారు.

ఈ ఘటనలో నిందితుడు ఖండేరుతో సహా మరో ముగ్గురు వ్యక్తులపై ఎఫ్​ఐఆర్​ నమోదు చేసినట్టు పోలీసులు వెల్లడించారు. తీవ్ర గాయాలపాలైన ఆ బాలికను చికిత్స నిమిత్తం ఆస్పత్రికి తరలించినట్టు పేర్కొన్నారు.

అయితే.. బాలిక కుటుంబ సభ్యులకు, నిందితులకు మధ్య పాత వివాదాలున్నట్టు ఎస్పీ చెప్పారు. ఈ కేసుపై దర్యాప్తు చేపట్టామన్న ఆయన.. వైద్య పరీక్షల నివేదికల ఆధారంగా తదుపరి చర్యలు చేపడతామని స్పష్టం చేశారు.

ఇదీ చదవండి:మొతేరాకు 'మోదీ స్టేడియం'గా నామకరణం