స్వాతంత్ర్యం సమయంలో పాక్​ నుంచి రాక.. 91 ఏళ్ల వయసులోనూ రైల్వే కూలీగా.. ఐదుగురు సంతానమున్నా..!

91 ఏళ్ల ఓ వృద్ధుడు నేటికీ రైల్వే స్టేషన్​లో కూలీ పనులు చేస్తున్నాడు. విశ్రాంతి తీసుకునే సమయంలో ఓ యువకుడిలా కష్టపడుతున్నాడు. 15 ఏళ్ల వయస్సులో పాకిస్థాన్​ నుంచి భారత్​ వచ్చిన ఆ వృద్దుడు ఇప్పటికీ అలుపెరగకుండా పనిచేసుకుంటున్నాడు. అతనెవరో తెలుసుకుందాం రండి..

ఆ పెద్ద మనిషికి 91 ఏళ్లు. వృత్తిరీత్యా ఆయన ఓ రైల్వే కూలి. అయినా ఇప్పటికీ కష్టపడి పనిచేస్తున్నాడు. విశ్రాంతి తీసుకునే సమయంలో ఓ యువకుడిలా బరువులు మోస్తున్నాడు. తొమ్మిది పదుల వయస్సులోనూ తన కాళ్లపై తాను నిలబడుతూ ఎందరికో ఆదర్శంగా నిలుస్తున్నాడు. 15 ఏళ్ల వయస్సులో పాకిస్థాన్​ నుంచి భారత్​ వచ్చిన ఆ వృద్దుడు నేటికీ అలుపెరగకుండా పనిచేసుకుంటున్నాడు. అతడే హరియాణాకు చెందిన కిషన్​చంద్​.

భారత్​, పాకిస్థాన్​ విడిపోక ముందు కిషన్​చంద్(91)​ ఖెలయా జిల్లాలో నివాసం ఉండేవాడు. విభజన అనంతరం భారత్​లోని పానీపత్​​కు వచ్చాడు. విభజన సమయంలో జరిగిన దృశ్యాలన్ని అతడు కళ్లారా చూశాడు. భారత్​-పాకిస్థాన్ విడిపోయిన సమయంలో కిశన్​ వయస్సు 15 సంవత్సరాలు. భారత్​కు వచ్చిన అతడు సొంతిళ్లు లేని కారణంగా రైల్వే స్టేషన్​లోనే స్థిరపడ్డాడు. స్టేషన్​లోనే కూలీ పనులు చేస్తూ జీవనం సాగించాడు. అలా నేటికీ అక్కడే పని చేస్తున్నాడు. కిషన్​చంద్​ 35 ఏళ్ల వయస్సులో పెళ్లి చేసుకున్నాడు. అతడికి ఓ కూతురు, నలుగురు కుమారులు ఉన్నారు. అయినా వారిపై ఆధారపడకుండా తన పని తానే చేసుకుంటున్నాడు. తన పిల్లలందరూ బాగా కష్టపడుతారని, వాళ్లు తనను​ బాగానే చూసుకుంటారని, అయినా వారి నుంచి ఏమి ఆశించకుండా తన ఖర్చులు తానే వెళ్లదీసుకుంటున్నానని కిషన్​ తెలిపాడు.

రైల్వే కూలీ కిషన్​చంద్​

మూటలు మోస్తున్న రైల్వే కూలీ కిషన్​చంద్​

"మొదట్లో ఇక్కడ పనిలో చేరినప్పుడు దిల్లీ నుంచి వచ్చే రైలు ఇంజిన్​లో బొగ్గు నింపేవాడిని. అప్పుడు నాకు ఒకటి, రెండు అణాలు ఇచ్చేవారు. బొగ్గును అంబాల వరకు తరలిస్తే రూ.1 ఇచ్చేవారు. ఇప్పుడు రోజుకు రూ. 100 నుంచి 200 వస్తున్నాయి. ఒక్కోసారి రోజుకు రూ. 400 వస్తాయి. నా వయస్సు దృష్ట్యా కొంచెం ఎక్కవే డబ్బులే ఇస్తారు ప్రయాణికులు. ఉదయం 8 గంటలకు రైల్వే స్టేషన్​కు వెళతాను. రాత్రి తొమ్మిది గంటలకు తిరిగొస్తాను."

--కిషన్​ చంద్​, రైల్వే కూలీ

చాలా ప్రభుత్వాలు వచ్చిపోతున్నాయి కానీ తమ సమస్యను ఎవ్వరూ తీర్చడం లేదంటున్నాడు కిషన్​చంద్​. స్టేషన్​లో పని చేసే కూలీలకు ఉద్యోగాలు ఇవ్వడంలేదని వాపోతున్నాడు. లాలు ప్రసాద్​ యాదవ్​, రామ్ విలాస్​ పాశ్వాస్​ రైల్వే మంత్రులుగా ఉన్న సమయంలో 50 సంవత్సరాలు లోపున్న కూలీలకు ఉద్యోగాలు ఉచ్చేందుకు ముందుకు వచ్చారన్నారు కిషన్​. ఆ ఉత్తర్వులు అమలయ్యే సమయానికి తన వయస్సు 50 ఏళ్లు దాటిపోయిందని ఆవేదన వ్యక్తం చేశాడు. ప్రస్తుతం ఏటా రూ. 90తో లైసెన్స్​ను రెన్యూవల్​ చేసుకుంటున్నట్లు కిషన్​ తెలిపాడు. ఇప్పుడున్న ప్రభుత్వాలైనా తనకు సాయం చేయాలని కోరుతున్నాడు.

రైల్వే కూలీ కిషన్​చంద్​

రైల్వే కూలీ కిషన్​చంద్​

• ఇవీ చదవండి: