కరోనా వైరస్‌ సెకండ్ వేవ్ సృష్టించిన విలయంతో దేశవ్యాప్తంగా 730మంది వైద్యులు ప్రాణాలు కోల్పోయినట్లు ఇండియన్‌ మెడికల్‌ ఆసోసియేషన్ (IMA) వెల్లడించింది. కేవలం ఒక్క బిహార్‌లోనే 115 మంది చనిపోగా, దిల్లీలో 109 మంది డాక్టర్లు కరోనా మహమ్మారికి బలయ్యారని తెలిపింది. ఇక తొలిదశ విజృంభణ సమయంలోనూ కరోనా కారణంగా 748 మంది వైద్యులు ప్రాణాలు కోల్పోయారని ఐఎంఏ రిజిస్ట్రీలో పేర్కొంది.
సెకండ్ వేవ్ సమయంలో ఉత్తర్‌ప్రదేశ్‌లో 79, పశ్చిమ బెంగాల్‌లో 62, రాజస్థాన్‌లో 43, ఝార్ఖండ్‌లో 39, ఆంధ్రప్రదేశ్‌లో 38 మంది వైద్యులు ప్రాణాలు కోల్పోయారని ఐఎంఏ వెల్లడించింది. ఇలా దేశవ్యాప్తంగా కేవలం సెకండ్ వేవ్ సమయంలో ఇప్పటివరకు మొత్తం 730 మంది వైద్యులు మరణించారని పేర్కొంది. దేశంలోనే అత్యధిక పాజిటివ్‌ కేసులు, కొవిడ్‌ మరణాలు చోటుచేసుకున్న మహారాష్ట్రలో 23 మంది వైద్యులు మృతిచెందారు. వైరస్‌ తీవ్రత అధికంగా ఉన్న కర్ణాటకలోనూ 9మంది చనిపోయారు.