ఆ చిన్నారి అద్భుత జ్ఞాపకశక్తికి పవర్​స్టార్​ ఫిదా!

శ్రీషా అనే ఆరేళ్ల చిన్నారిని కలుసుకునేందుకు ఏకంగా కన్నడ పవర్​స్టార్ పునీత్ రాజ్​కుమార్ వచ్చారు. షూటింగ్​లతో నిత్యం బిజీగా ఉండే ఆయన చిన్నారిని కలుసుకునేందుకు స్వయంగా ఎందుకొచ్చారా అని ఆలోచిస్తున్నారా? అదేనండీ ఆ చిన్నారి ప్రతిభలో ఉన్న గొప్పతనం. ఆరేళ్ల వయసుకే ఎన్నో రికార్డులు, డాక్టరేట్లు సాధించి శెభాష్‌ అనిపించుకుంటోన్న ఆ చిన్నారి ప్రతిభాపాటవాలను మీరూ చూసేయండి మరి..

ఆ చిన్నారికి ఇంకా ఆరేళ్లయినా నిండలేదు. అయితేనేం తన అభిరుచి, తపనకు తగ్గట్టుగా ప్రతిభకు పదును పెట్టింది. రాష్ట్రాలు, ప్రముఖులు, అలనాటి సినిమాల పేర్లను అలవోకగా చెప్పేస్తూ అవార్డులు కొట్టేస్తోంది. అంతేకాదు ప్రముఖుల ప్రశంసలూ అందుకుంటోంది. నైపుణ్యం సంపాదించేందుకు వయసు అడ్డురాదని రుజువుచేస్తోందా చిన్నారి.

తాను సాధించిన రికార్డులను చూపిస్తూ

చిన్నారి ప్రతిభకు రికార్డులు దాసోహం..

కాదేదీ ప్రతిభకు అనర్హం..

కర్ణాటక ధార్వాడ్ జిల్లా కుందగోల పట్టణానికి చెందిన శ్రీషా ముదగన్నవర్ అనే చిన్నారి జనరల్ నాలెడ్జ్​లో అద్భుత ప్రతిభ కనబరుస్తోంది. దీనిని గుర్తించిన యూనివర్సల్ తమిళ్ యూనివర్సిటీ ఆమెకు గౌరవ డాక్టరేట్​ను ప్రదానం చేసింది. పట్టణానికి చెందిన ఈశ్వర్-కీర్తిల కుమార్తె అయిన శ్రీషా రెండో తరగతి చదువుతోంది. పలు అంశాల్లో ప్రతిభను ప్రదర్శిస్తున్న ఈ చిన్నారి ఇండియా బుక్ ఆఫ్ రికార్డ్స్(India Book of Records), ఎక్స్‌క్లూజివ్ వరల్డ్ రికార్డ్(Exclusive World Record), కర్ణాటక అచీవర్స్ ఆఫ్ బుక్ రికార్డ్స్(Karnataka Achievers Book of Records), ఫ్యూచర్ కలాం బుక్ ఆఫ్ రికార్డ్స్(Future Kalams Book of Records), ది యూనివర్స్ అచీవర్స్ బుక్ ఆఫ్ రికార్డ్స్‌(The Universe Achievers Book of Records) వంటి రికార్డులను కూడా దక్కించుకుంది.

చిన్నారి శ్రీషా

ప్రశ్నలకు సమాధానాలిస్తున్న చిన్నారి

అదెంతో ఈజీ..

రామాయణ, మహాభారత గ్రంథాల రచయితలు, దేశ స్వాత్యంత్రానికి పూర్వం పాలించిన బ్రిటీషు గవర్నర్ల పేర్లు చిన్నారికి కొట్టినపిండి. జవహర్​లాల్ నెహ్రూ ప్రస్థానం, ఎవరెస్ట్ ఎక్కిన మొదటి భారతీయ మహిళ వంటి అనేక అంశాలపై సంధించే ప్రశ్నలకు నవ్వుతూ సమాధానమిస్తోందీ చిన్నారి. ఇక మొదటి వ్యాకరణ గ్రంథకర్త, కర్ణాటక తొలి ముఖ్యమంత్రి, కర్ణాటక కేసరి, కర్ణాటక గాంధీ సహా.. రాష్ట్రంలో అచ్చయిన తొలి పత్రిక వంటి పేర్లను అలవోకగా చెప్పేస్తోంది.

శ్రీషా సాధిస్తున్న విజయాలపై స్పందించిన ఆమె తల్లి.. తన కూతురు చదువుల్లోనూ బాగా రాణిస్తున్నట్లు తెలిపారు.

"శ్రీషా ప్రతిభకు మేము ఆశ్చర్యపోయాం. ఆమె ఎంతో ప్రత్యేకం అని అనిపించింది. పాపకు అన్నీ గుర్తుంటాయి. పలు విషయాలను నేర్పించాలనుకున్నా. ఆమె ప్రతిభను మరింత మెరుగుపరచాలనుకున్నా. కనీసం 6వేల ప్రశ్నలకు సమాధానాలు చెప్పగలదు. రాబోయే కాలంలో ఆమె మరిన్ని అంశాలపై పట్టు సాధిస్తుందని ఆశిస్తున్నా."

-కీర్తి, శ్రీషా తల్లి

పవర్​స్టార్ ప్రశంసలు..

పునీత్ రాజ్​కుమార్​ తండ్రి నటించిన సినిమాల జాబితాను చెప్తున్న శ్రీషా

దివంగత నటుడు, కన్నడ లెజెండరీ యాక్టర్ డా.రాజ్‌కుమార్(Dr. Rajkumar Movies List) నటించిన 200కు పైగా సినిమాల పేర్లను కేవలం మూడు నిమిషాల్లో చెప్పేస్తోంది శ్రీషా. ఈ విషయం తెలిసి ఆమెను స్వయంగా కలుసుకున్న దిగ్గజ నటుడి తనయుడు, కన్నడ పవర్ స్టార్(Kannada Power Star) పునీత్ రాజ్​కుమార్(Puneeth Rajkumar) ఆమెను ప్రశంసించారు. 'తన తండ్రి నటించిన సినిమాల పేర్లన్నీ చెప్పగలవా' అంటూ ఆయన స్వయంగా ప్రశ్నించగా.. 206 సినిమాల పేర్లను తడుముకోకుండా చెప్పేసింది శ్రీషా. దీనితో ఆశ్చర్యపోవడం పవర్​స్టార్ వంతైంది.! ఆ చిన్నారి.. జీవితంలో ఉన్నత స్థాయికి ఎదగాలని దీవించారు పునీత్​ రాజ్​కుమార్​.

శ్రీషాను కలుసుకున్న పవర్​స్టార్ పునీత్ రాజ్​కుమార్​

ఇవీ చదవండి: