కుటుంబాన్ని కబళించిన కరోనా - 10రోజుల్లో ఐదుగురు బలి

ఏడుగురితో అన్యోన్యమైన అనుబంధాలున్న ఆ పచ్చని కుటుంబాన్ని చూసి కరోనాకు కన్నుకుట్టింది. 10 రోజుల వ్యవధిలో వారిలో ఐదుగురిని బలిగొంది. ఈ ఘటన మహారాష్ట్ర సోలాపుర్ జిల్లా​లో జరిగింది.

కరోనా మహమ్మారి రక్తసంబంధాలను తెంచేస్తోంది. కుటుంబాలకు కుటుంబాలను చిదిమేస్తోంది. ఇలాంటి విషాదకర ఘటనే మహారాష్ట్రలోని సోలాపుర్​లో జరిగింది. మాదా తాలుకాలోని తెంభుర్నికి గ్రామానికి చెందిన ఓ కుటుంబంలో.. పదిరోజుల వ్యవధిలో ఐదుగురిని కొవిడ్ బలితీసుకుంది.

ప్రస్తుతం ఆ కుటుంబంలో భయ్యా షేక్​ అనే వ్యక్తి సహా అతని 16 నెలల కుమార్తె మాత్రమే సజీవంగా ఉన్నారు. ఏప్రిల్​ నెలలో అతడి​ తండ్రికి మొదటగా కరోనా సోకింది. అనంతరం మిగతా వారికీ వైరస్​ పాజిటివ్​గా నిర్ధరణ అయింది. అయితే.. చికిత్స పొందుతూ భయ్యా షేక్​ తండ్రి ఏప్రిల్​ 27న ప్రాణాలు కోల్పోయాడు. అనంతరం మే1న అతని తల్లి వైరస్​కు బలైంది.

కన్నీటి తడి ఆరకముందే..

తల్లిదండ్రులు చనిపోయారన్న బాధ నుంచి ఇంకా కోలుకోకముందే.. మే 5న భయ్యా షేక్​ సోదరుడు ఇక్బాల్​ హనీఫ్​ షేక్​(31) మహమ్మారి కారణంగా మృతి చెందాడు. అతని సవతి తల్లి రుక్షానా హనీఫ్​ షేక్​ కూడా కొవిడ్​తో ప్రాణాలు విడిచింది. మే 6న భయ్యా షేక్​ భార్య అర్జిత(24).. కరోనా కాటుకు కన్నుమూసింది. దాంతో వారి 16 నెలల కూతురు తల్లిలేనిదిగా మిగిలింది. మహమ్మారి నింపిన విషాదంతో ఆ తండ్రి, కుమార్తె మాత్రమే ఇప్పుడు మిగిలారు.

ఇదీ చూడండి:జూపార్కులో కరోనాతో ఆడ సింహం మృతి

ఇదీ చూడండి:కరిచిందని.. కుక్కను తుపాకీతో కాల్చి..