UP Rampur Bypoll 2022: దేశవ్యాప్తంగా ఉపఎన్నికల ఫలితాల్లో భాజపా సత్తా చాటింది. జూన్ 23న జరిగిన ఉపఎన్నికల ఫలితాలు తాజాగా వెలువడ్డాయి. ఉత్తర్‌ప్రదేశ్‌ రాజకీయాల్లో తిరుగులేని శక్తిగా ఎదుగుతున్న అధికార భాజపా... సమాజ్వాదీ పార్టీని గట్టి దెబ్బ కొట్టింది. ఎస్పీ సిట్టింగ్ స్థానమైన రాంపుర్ లోక్సభ స్థానంలో భాజపా జయకేతనం ఎగురవేసింది. ఎస్పీ నేత ఆజంఖాన్ రాజీనామాతో రాంపుర్ స్థానం ఖాళీ కాగా ఉపఎన్నికలో భాజపా అభ్యర్థి ఘన్ శ్యామ్ లోధి సుమారు 42వేల ఓట్ల మెజార్టీతో గెలుపొందారు. రామ్‌పుర్‌ పార్లమెంటు పరిధిలో మొత్తం 18.38 లక్షల మంది ఓటర్లు ఉండగా.. అందులో 60శాతం మంది ముస్లిం, మైనారిటీలే ఉన్నారు. దీంతో ఆ స్థానం ఆజంఖాన్‌కు కంచుకోటగా మారింది. అయితే ఆ కంచుకోటను బద్దలుకొట్టిన యోగి ఆదిత్యనాథ్‌ సర్కార్‌ ఆ ప్రాంతంలోనూ భాజపాను తిరుగులేని శక్తిగా నిలబెట్టింది.
ఆజంగఢ్ స్థానం కైవసం..
మరోవైపు, ఎస్పీ అధినేత అఖిలేశ్ యాదవ్ రాజీనామాతో ఖాళీ అయిన ఆజంగఢ్ లోక్సభ స్థానంలోనూ భాజపా విజయం సాధించింది. ఆ పార్టీ అభ్యర్థి దినేశ్ లాల్ యాదవ్ 8679 ఓట్ల తేడాతో గెలుపొందారు. కాగా, రాంపుర్లో భాజపా విజయంపై ఆజంఖాన్ అనుమానాలు వ్యక్తం చేశారు. అధికార యంత్రాంగాన్ని భాజపా దుర్వినియోగం చేసిందని ఆరోపించారు. ఏదైనా అంతర్జాతీయ సంస్థ ఇక్కడ ఎన్నికలు నిర్వహించాలని అన్నారు. అప్పుడు కూడా ఎస్పీ అభ్యర్థి ఓడిపోతే తాను రాజకీయ సన్యాసం తీసుకుంటానని చెప్పారు.
తాజా ఉపఎన్నికల్లో ఆమ్ ఆద్మీ పార్టీకి మిశ్రమ ఫలితాలు ఎదురయ్యాయి. పంజాబ్లో అధికార పార్టీకి ఎదురుదెబ్బ తగిలింది. సంగ్రూర్ లోక్సభ స్థానంలో శిరోమణి అకాలీదళ్ నేత సిమ్రన్ జీత్ మాన్ గెలుపొందారు. ఈ స్థానం నుంచి గెలుపొందిన ఆప్ నేత భగవంత్ మాన్.. పంజాబ్ సీఎంగా బాధ్యతలు స్వీకరించిన నేపథ్యంలో సంగ్రూర్ లోక్సభ స్థానానికి ఉపఎన్నికలు జరిగాయి. శిరోమణి నేత సిమ్రన్ జీత్ మాన్‌కు మెుత్తం 2,53,154 ఓట్లు రాగా, ఆప్ అభ్యర్థి గుర్‌మెయిల్‌ సింగ్‌కు.. 2,47,332 ఓట్లు వచ్చినట్లు తెలుస్తోంది. దీంతో సిమ్రన్ జిత్‌ 5,822 ఓట్ల తేడాతో విజయం సాధించినట్లు పోలింగ్ అధికారులు తెలిపారు.
దిల్లీలో ఊరట
మరోవైపు, దిల్లీలోని రాజిందర్ నగర్ అసెంబ్లీ స్థానాన్ని ఆప్ నిలబెట్టుకుంది. రాజ్యసభ ఎంపీగా గెలుపొందిన నేపథ్యంలో ఆ స్థానానికి ఆప్ నేత రాఘవ్ చద్ధా రాజీనామా చేయగా.. ఎన్నికలు జరిగాయి. ఇందులో ఆప్ ఘన విజయం సాధించింది. ఆ పార్టీ నేత దినేశ్ పాఠక్ 55 శాతానికి పైగా ఓట్లు దక్కించుకొని విజయఢంకా మోగించారు.