ఒకే ఊరిలో 170 మందికి కరోనా పాజిటివ్​

ఛత్తీస్​గఢ్​లో ఓ గ్రామానికి చెందిన 170 మందికి కరోనా పాజిటివ్​గా తేలింది. తొలుత ఆ ఊరు సర్పంచ్​కు వైరస్​ సోకగా.. ఇటీవల గ్రామంలో నిర్వహించిన ఓ కార్యక్రమంలో ఆయన పాల్గొన్నారు. వైరస్​ వ్యాప్తికి ఇదో కారణమవగా.. ఆ గ్రామస్థులు కూలీ పనులకు రాయ్​పుర్​ వెళ్లీ వస్తుండటం మరో కారణమని అధికారులు చెబుతున్నారు.

ఛత్తీస్​గఢ్​ దుర్గ్​ జిల్లాలోని డౌర్ గ్రామంలో భారీగా వెలుగు చూసిన కరోనా​ కేసులు ఆందోళన కలిగిస్తున్నాయి. ఆ ఊరిలో 170 మందికి వైరస్​ సోకింది. కొన్ని రోజుల క్రితం ఊరిలో ఓ కార్యక్రమాన్ని గ్రామస్థులు నిర్వహించారు. అది వైరస్​ వ్యాప్తికి కారణమైనట్లు అధికారులు భావిస్తున్నారు. ఒకే గ్రామంలో అంతమందికి కొవిడ్​ పాజిటివ్​ రావటం వల్ల అప్రమత్తమయ్యారు.

కఠిన ఆంక్షలు

ఎక్కువ మందికి వైరస్ సోకిన నేపథ్యంలో ఆ గ్రామాన్ని కంటైన్​మెంట్​ జోన్​గా ప్రకటించారు. ఎవరూ బయటకు వెళ్లకుండా ఆంక్షలు విధించారు. డౌర్​లో 1500 కుటుంబాలు నివసిస్తున్నాయి. దాదాపు 4500 మంది జనాభా ఉన్నారు. వీరిలో 3000 మందికి కొవిడ్​ పరీక్షలు చేయగా.. 170 మందికి పాజిటివ్​గా తేలిందని వైద్యాధికారులు తెలిపారు.

ఆ జాబితా సిద్ధం

ఆ ఊరుకు వచ్చి వెళ్లిన వారి జాబితాను సిద్ధం చేసిన అధికారులు.. వారందరినీ హోమ్​ ఐసోలేషన్​ చేశారు. జిల్లాలో కొవిడ్​ కేసులు పెరుగుతున్న నేపథ్యంలో 144 సెక్షన్​ విధించారు జిల్లా పాలనాధికారి. కఠిన ఆంక్షలు అమలు చేస్తున్నారు. బహిరంగ ప్రదేశాల్లో ఎవరైనా కనిపిస్తే.. వారిని జైల్లో పెట్టమని ఆదేశాలు జారీ చేశారు.

కారణమిదే!

తొలుత ఆ గ్రామ సర్పంచ్​కు కరోనా సోకినట్లు తేలింది. గ్రామంలో నిర్వహించిన కార్యక్రమంలో ఆయన కూడా​ పాల్గొన్నారు. ఈ ఊరు నుంచి కూలి పనుల కోసం రాయ్​పుర్​ వెళ్లొచ్చినవారు అధికంగానే ఉన్నారు. ఈ రెండు కారణాల వల్ల వైరస్​ సోకినట్లు అధికారులు భావిస్తున్నారు.

ఇదీ చూడండి:దేశంలో మరో 68 వేల మందికి కరోనా