తమ ఉత్పత్తులు, చేసే పనులకు ప్రచారం కల్పించుకోలేని వారికి సామాజిక మాధ్యమాలు ఒక వరంలా మారుతున్నాయి. చాలా మంది స్నాక్స్, టిఫిన్స్, భోజనం విక్రయించేవారు, గాయకులు, డ్యాన్సర్లు సోషల్ మీడియా ద్వారా రాత్రికి రాత్రే పాపులర్గా మారిన సంఘటనలు చూశాం. కొద్ది రోజుల క్రితం దిల్లీకి చెందిన 'బాబాకా దాబా' వైరల్(Baba ka Daba)గా మారినట్లుగానే.. అహ్మదాబాద్లోని మనీనగర్కు చెందిన ఓ బాలుడు విక్రయిస్తున్న 'దహీ కచోరీ'(Dahi Kachori news) పాపులర్ అయింది.
మనీనగర్కు చెందిన తన్మయ్ అగర్వాల్(14).. అహ్మదాబాద్ రైల్వేస్టేషన్ సమీపంలో ద్విచక్ర వాహనంపై రూ.10కి దహీ కచోరీ విక్రయిస్తుంటాడు. ప్రస్తుతం ఎనిమిదో తరగతి చదువుతున్నాడు. ఆ బాలుడి పనిని ఓ యువకుడు వీడియో తీసి సోషల్ మీడియాలో పోస్ట్ చేయగా.. అది కాస్త వైరల్గా మారింది. ఆ తర్వాతి రోజు నుంచే దహీ కచోరీ తినేందుకు తన్మయ్ బండి వద్ద జనం తాకిడి పెరిగింది.
" ఓ యువకుడు నా వీడియో తీసి సామాజిక మాధ్యమాల్లో పోస్ట్ చేశాడు. అది వైరల్గా మారింది. ఆ తర్వాతి రోజు నుంచే కస్టమర్లు పెరగటం గమనించాను. మా నాన్న, అమ్మ, చెల్లి, నానమ్మ కచోరీలు తయారు చేస్తారు. ఉమ్మడి కుటుంబంలో కలహాలతో మేము ఆర్థికంగా ఇబ్బందులు ఎదుర్కొంటున్నాం. కుటుంబానికి సాయంగా ఉండేందుకే కచోరీలు విక్రయిస్తున్నా. "