చిరుతతో 12 ఏళ్ల బాలుడి వీరోచిత పోరాటం!

మీకు ఒక్కసారిగా చిరుత ఎదురుపడితే ఏం చేస్తారు? భయంతో కుప్పకూలిపోవటం తప్ప ఆ సమయంలో మరో ఆలోచనే రాదు. కానీ మహారాష్ట్ర నాసిక్​లో ఓ 12 ఏళ్ల బాలుడు తనపై దాడి చేసిన చిరుతపై వీరోచిత పోరాటం చేశాడు. ఒక చేతికి గాయమైనా.. మరో చేతితో చిరుతపై ఎదురుదాడి చేసి ప్రాణాలు కాపాడుకున్నాడు. ఎంతో ధైర్యంగా వ్యవహరించిన ఆ బాలుడిని ప్రస్తుతం అందరూ మెచ్చుకుంటున్నారు.

పొలానికి వెళ్లిన సమయంలో తనపై దాడి చేసిన చిరుతతో వీరోచిత పోరాటం చేశాడు ఓ 12 ఏళ్ల బాలుడు. ఒక చేతికి తీవ్ర గాయమైనా.. మరో చేతితో చిరుతను ఎదుర్కొన్నాడు. గాయమైన చేతికి ఆరుకుట్లు పడినట్లు వైద్యులు తెలిపారు. ఈ సంఘటన మహారాష్ట్ర నాసిక్​ జిల్లా సిన్నార్​ తాలుకాలోని సోనారీ గ్రామంలో గత మంగళవారం జరిగింది. ఎంతో ధైర్యంతో చిరుత నుంచి తనను తాను కాపాడుకున్న బాలుడిని అందరూ మెచ్చుకుంటున్నారు.

ఇదీ జరిగింది..

గత మంగళవారం రోజున తన కుటుంబ సభ్యులతో కలిసి పంటభూమి వద్దకు వెళ్లాడు సోనారీ​ గ్రామానికి చెందిన గౌరవ్​ కులంగే. తమ మొక్కజొన్న పంట లోపలికి ఒంటరిగా వెళ్లిన క్రమంలో అందులో ఉన్న చిరుత పులి ఒక్కసారిగా బాలుడిపై దాడి చేసింది. ఒక చేతిపై చిరుత పంజా పడింది. దీంతో షాక్​కు గురైన బాలుడు బిగ్గరగా అరుస్తూనే.. మరోవైపు చిరుతపై ఎదురుదాడికి దిగాడు. చిరుత ముఖంపై బలంగా కొట్టటం వల్ల.. దూరంగా వెళ్లిపోయిందని, వెంటనే అక్కడి నుంచి పరుగున కుటుంబ సభ్యుల వద్దకు వచ్చేసినట్లు తెలిపాడు గౌరవ్​.

దాడి జరిగిన తర్వాత గౌరవ్​ను నాసిక్​ ప్రభుత్వ ఆసుపత్రికి తరలించారు కుటుంబసభ్యులు. వైద్యుల పర్యవేక్షణలో ఒకరోజు ఉంచుకుని బుధవారం మధ్యాహ్నం డిశ్చార్జి చేశారు. ప్రస్తుతం తాను బాగానే ఉన్నానని, మణికట్టుపై నాలుగు కుట్లు, పైన మరో రెండు కుట్లు పడ్డాయని వెల్లడించాడు గౌరవ్​. సుమారు 30 సెకన్ల పాటు చిరుతతో పోరాడినట్లు చెప్పాడు.

దాడి ఘటనపై పోలీసులు, అటవీశాఖ అధికారులకు సమాచారం అందించారు గౌరవ్​ తల్లిదండ్రులు. ప్రస్తుతం ఆ చిరుత గ్రామ శివార్లలోనే ఉండి ఉండొచ్చని పేర్కొన్నారు అటవీ శాఖ అధికారులు. చెరుకు సాగు ఎక్కువగా ఉన్నందున వాటి సంచారం పెరిగిందన్నారు. చిరుతను పట్టుకునేందుకు 10 వరకు బోన్లు ఏర్పాటు చేసినట్లు తెలిపారు.

ఇదీ చూడండి: అసోంలో ఏనుగుల గుంపు హల్​చల్​