Jammu Kashmir floods: జమ్ముకశ్మీర్లో అకస్మికంగా సంభవించిన వరదల వల్ల పర్యటక ప్రాంతమైన పహల్గామ్లో 11 మంది సందర్శకులు, ఇద్దరు టూరిస్ట్ గైడ్లు వరదల్లో చిక్కుకున్నారని అధికారులు తెలిపారు. ఒకరు వరదల్లో కొట్టుకుపోయారని పేర్కొన్నారు. వీరు టార్సర్ మార్సర్ సరస్సు సమీప ప్రాంతాన్ని సందర్శిస్తుండగా ఈ ప్రమాదం జరిగింది. వెంటనే రెస్క్యూ టీం ఘటనా స్థలానికి చేరుకుని సహాయక చర్యలను చేపట్టింది. టార్సర్ మార్సర్ అనేవి రెండు సరస్సులు. ఇవి త్రాల్, పహల్గామ్, శ్రీనగర్ పర్వత ప్రాంతాల్లో ఉన్నాయి. అమర్నాథ్ ఆలయం సమీపంలోనే పహల్గామ్ ఉంది. కొండను ఎక్కి ఈ ప్రాంతాన్ని చేరుకుంటారు.
వరదల ధాటికి పలుచోట్ల కొండచరియలు విరిగిపడ్డాయి. జమ్ము-శ్రీనగర్ జాతీయ రహదారి కొట్టుకుపోయింది. ఈ అంతరాయం వల్ల వందలాది వాహనాలు రోడ్డు మీద నిలిచిపోయాయని అధికారులు తెలిపారు. పూంచ్, రాజౌరి జిల్లాలను షోపియాన్ జిల్లాతో కలిపే మొఘల్ రహదారిపై కూడా కొండచరియలు విరిగిపడడం వల్ల రహదారిని మూసేశారు అధికారులు. ఈ ఘటనల్లో ఎలాంటి ప్రాణ నష్టం జరగలేదని అధికారులు తెలిపారు.