Sexual Harassment: తల్లికి కూడా చెప్పుకోలేక పోయిందా బాలికా..! గురుకుల పాఠశాలలో లైంగిక వేధింపులు!

Harassment in Gurukula School: స్కూళ్లు ప్రారంభమయ్యాయి. కానీ తన కుమార్తె మాత్రం పాఠశాలకు వెళ్లడానికి నిరాకరించింది. ఎంత చెప్పినా సరే వెళ్లనని మొండికేసింది. ఎనిమిదవ తరగతి చదువుతున్న ఆ విద్యార్థిని ఏమని చెప్పగలదు. పాఠశాలలోని ఓ ఉద్యోగి తనపై లైంగిక వేధింపులకు పాల్పడుతున్నాడని చెప్పలేకపోయింది. దీంతో పాఠశాలకు వెళ్లమని తల్లి గట్టిగా చెప్పడంతో.. కన్నీరు పెట్టుకుంటూ తన బాధను చెప్పుకుంది. 

అనంతపురం జిల్లా ఉరవకొండ పట్టణంలోని బీఆర్ అంబేడ్కర్ గురుకుల పాఠశాలలో ఓ విద్యార్థిని ఎనిమిదో తరగతి చదువుతోంది. పాఠశాలలోని ఓ ఉద్యోగి తనపై లైంగిక వేధింపులకు పాల్పడుతున్నాడని, దీనికి మరో మహిళా ఉద్యోగి సహకరిస్తున్నట్లు.. విద్యార్థిని తల్లిదండ్రులు పోలీసులకు ఫిర్యాదు చేశారు. దీనిపై పాఠశాలలోని ఇతర విద్యార్థినులను పోలీసులు ఆరా తీసినట్లు.. అదే విధంగా పాఠశాల ప్రధాన అధికారిణితో ఫోన్​లో మాట్లాడి వివరాలు సేకరించినట్లు తెలుస్తోంది. 

విద్యార్థి సంఘాల నాయకుల ఆందోళన: ఎనిమిదవ తరగతి విద్యార్థినిపై లైంగిక వేధింపుల ఆరోపణలు రావడంతో.. విద్యార్థి సంఘాల నాయకులు ధర్నా నిర్వహించారు. పాఠశాల వద్ద టీఎన్​ఎస్​ఎఫ్, ఎస్​ఎఫ్ఐ విద్యార్థి సంఘం నాయకులు ధర్నా చేపట్టారు. మైనర్ విద్యార్థినిపై లైంగిక వేధింపులకు పాల్పడినవారిని కఠినంగా శిక్షించాలని డిమాండ్ చేశారు.