కడప జిల్లా ప్రొద్దుటూరుకు చెందిన తెలుగుదేశం పార్టీ నేత నందం సుబ్బయ్యను హత్య చేసింది ప్రత్యర్థులే అని ఆ పార్టీ పొలిట్ బ్యూరో సభ్యుడు శ్రీనివాసులు రెడ్డి ఆరోపించారు. బుధవారం సుబ్బయ్య కుటుంబాన్ని పరామర్శించిన ఆయన... అనంతరం మీడియాతో మాట్లాడారు. వైకాపా నేతలు చేస్తున్న అక్రమాలు, అవినీతిని బయటకు తీస్తున్నందుకే సుబ్బయ్యను హత్య చేశారని అన్నారు. తెదేపా కార్యకర్తలను భయపెట్టాలన్న ఉద్దేశంతోనే అధికార పార్టీ నేతలు ఈ దారుణానికి ఒడిగట్టారని విమర్శించారు. దీని వెనుక ప్రభుత్వ పెద్దల హస్తం ఉందన్నారు.
తన భర్త హత్యకు ఎమ్మెల్యే శివప్రసాద్ రెడ్డి, బంగారు రెడ్డి కారణమని అపరాజిత ఫిర్యాదు చేసినా పోలీసులు పట్టించుకోలేదని శ్రీనివాసులు రెడ్డి మండిపడ్డారు. ఎఫ్ఐఆర్లో వారి పేర్లను చేర్చితేనే సుబ్బయ్య అంత్యక్రియలు చేస్తామని స్పష్టం చేశారు. మరోవైపు తెదేపా జాతీయ ప్రధాన కార్యదర్శి నారా లోకేశ్ ప్రొద్దుటూరుకి వచ్చి సుబ్బయ్య కుటుంబాన్ని పరామర్శించనున్నారు.