కడప శివారులోని కేఎల్ఎం ఇంజినీరింగ్ కళాశాలలోని స్ట్రాంగ్ రూముల్లో భద్రపరచిన ఈవీఎంలు, వీవీప్యాట్లను కలెక్టర్ హరికిరణ్ మరోసారి పరిశీలించారు. జాయింట్ కలెక్టర్ కోటేశ్వరరావు, ఆర్డీవో మలోలాతో కలిసి కలెక్టర్ స్ట్రాంగ్ రూంలను తనిఖీ చేశారు. ఈనెల 23న జిల్లాలోని పది అసెంబ్లీ నియోజకవర్గాలు, రెండు లోక్సభ నియోజకవర్గాల ఓట్ల లెక్కింపు ఇక్కడే జరగనుంది. ఈవీఎంలు భద్రపరచిన భవనాలు భారీ వర్షం వచ్చినా తడిసి పోకుండా భారీ టార్పాలిన్ కవర్లను కప్పారు. అవి ఏమేరకు భద్రంగా ఉన్నాయని కలెక్టర్ పరిశీలించారు. వీటితోపాటు అన్ని గదుల్లో ఏర్పాటు చేసిన సీసీటీవీలు పనిచేస్తున్నాయా లేదా అని సంబంధిత అధికారులను ఆరా తీశారు. సీసీటీవీలు ఉన్న కమాండ్ కంట్రోలు కేంద్రంలోకి వెళ్లి పరిశీలించారు. స్ట్రాంగ్ రూములకు వేసిన సీల్ ను పరిశీలించి... పహారా కాస్తున్న సీఎర్పీఎఫ్ సిబ్బందిని అప్రమత్తం చేశారు. ఈనెల 23వ తేదీ వరకు నిఘా పటిష్ఠంగా ఉండాలని... పోలీసులు, అధికారులు అప్రమత్తంగా ఉండాలని కలెక్టర్ ఆదేశించారు.
